იტალიის ჩემპიონ „იუვენტუსის“ თავდამსხმელი კრიშტიანუ რონალდუ მოედანს არათუ უგოლოდ, არამედ საგოლე პასის გარეშეც აღარ ტოვებს. პორტუგალიელმა სერია A-ს მიჯრით სამ მატჩში მოახერხა როგორც გოლის გატანა, ისე საგოლე გადაცემის გაკეთება.

ნიშანდობლივია, რომ კრიშტიანუს კარიერაში მსგავსი ფაქტი მეორედ დაფიქსირდა. მიჯრით სამ შეხვედრაში გოლი+პასი პორტუგალიელს პირველად 2014 წელს „რეალის“ მაისურით ჰქონდა მითვლილი და ახლა იგივე „იუვენტუსშიც“ გააკეთა.

აქვე გეტყვით, რომ რონალდუმ „პარმასთან“, „სასუოლოსთან“ და „ფროზინონესთან“ მატჩებში მოახერხა გოლის გატანაც და საგოლე პასის გაკეთებაც.

სერია A-ს მიმდინარე სეზონში 34 წლის პორტუგალიელმა 24 შეხვედრაში 19 გოლი გაიტანა და 8 საგოლე გადაცემა შეასრულა. კრიშტიანუ ბომბარდირთა დავაში ლიდერია, ხოლო მეპასეებში „მილანელ“ სუსოსთან ერთად პირველ-მეორე ადგილებს ინაწილებს.