აშშ-ს ქალაქ სენტ ლუისში მიმდინარე პრესტიჟულ საჭადრაკო ტურნირზე პირველი გამარჯვება იზეიმა საქართველოს ქალთა ნაკრების ლიდერმა ნანა ძაგნიძემ (2513).

Cairns Cup-ის მე-3 ტურში ძაგნიძემ თეთრი ფიგურებით ფრანგი მარი სებაგი (2476) დაამარცხა და სატურნირო მდგომარეობა გაიუმჯობესა. ახლა, ნანას აქტივში 1.5 ქულაა და ის მეოთხე-მეშვიდე ადგილებს ინაწილებს.

1.0 ქულა შერჩა აქტივში ბელა ხოტენაშვილს (2491), რომელმაც შავებით აშშ-ს სახელით მოთამაშე ანა ზატონსკიხთან (2428) წააგო. შედეგად, ქართველი მოჭადრაკე ხსენებულ სებაგთან ერთად მეცხრე-მეათე პოზიციებს იყოფს.

ტურნირის ერთპიროვნული ლიდერი რუსი ალექსანდრა კოსტენიუკი (2532) გახლავთ, რომლის აქტივშიც 3.5 ქულაა, მას კი კვალში, 2-2 ქულით ირინა კრუში (აშშ, 2435) და ვალენტინა გუნინა (რუსეთი, 2501) უდგანან.

მე-4 ტურში, რომელიც დღეს ღამით შედგება, ქართველები თეთრი ფიგურებით ითამაშებენ: ძაგნიძე გუნინას დაუპირისპირდება, ხოლო ხოტენაშვილის მეტოქე ყაზახი ჟანსაია აბდუმალიკი (2468) იქნება.

შეგახსენებთ, რომ სენტ ლუისის საერთაშორისო ტურნირი ათ მონაწილეს შორის წრიული სისტემით მიმდინარეობს და მისი საპრიზო ფონდი 150 ათასი დოლარია, საიდანაც ჩემპიონი 40 ათასს მიიღებს.