ავტოსპორტი

22:17 | 7.02.2019 | ნანახია [] - ჯერ

„ჰაასმა“ ახალი სეზონი გახსნა

ამერიკული „ჰაასი“ ფორმულა 1-ის პირველი გუნდია, რომელმაც ახალი სეზონისთვის მომზადებული სარბოლო ავტომობილი გვიჩვენა. იმავდროულად, გუნდმა თავისი ახალი გენერალური სპონსორი და თავისი ახალი ფერებიც გაგვაცნო. ახალი სეზონიდან, „ჰაასის“ ავტომობილები შავსა და ოქროსფერში გამოეწყობიან.

გუნდმა ახალი ფერების წარდგენა ლონდონის სამეფო საავტომობილო კლუბის ჰოლში ჩაატარა. მაგრამ ამისათვის შარშანდელი მანქანა გამოიყენა. ახალი სარბოლო ავტომობილი კი (VF-19), ინტერნეტით გავრცელებული ფოტოებით წარმოადგინა.

ახალი სპონსორია ენერგეტიკული სასმელების მწარმოებელი ბრიტანული კომპანია „რიჩ ენერჯი“, რომლის უპირველესი ამბიციაც, ბიზნესში უშუალო კონკურენტის, „რედ ბულის“ დამარცხებაა.

„ფორმულა ერთში მოსვლით, ჩვენ მეცხრე ცაზე ვართ. ეს ჩვენი ბრენდისთვის საუკეთესო პლატფორმაა. ჩვენი მთავარი მეტოქე, ტრეკზეც და მის გარეთაც, „რედ ბულია“. ჩვენი მიზანი მათთან პაექრობაა. ამისთვის საუკეთესო პარტნიორი ავირჩიეთ „ჰაასის“ სახით, რომელთანაც ბევრი საერთო გვაქვს“, - ამბობს „რიჩ ენერჯის“ მთავარი აღმასრულებელი უილიამ სტორი.

ამერიკული „ჰაასისთვის“, რომელიც ბრიტანეთშია ბაზირებული, 2019 წლის სეზონი მეოთხე იქნება ფორმულა 1-ში. შარშან მან კონსტრუქტორთა პირველობაზე მეხუთე ადგილი დაიკავა, რაც უდაოდ დიდი მიღწევაა. „ჰაასმა“ ახალი სეზონისთვის, ფრანგი რომენ გროჟანი და დანიელი კევინ მაგნუსენი დაიტოვა, რომლებიც ამერიკულ გუნდთან ერთად, მესამე სეზონში იაპარეზებენ.

Loading...
0.161796