პსჟ სენსაციურად გამოეთიშა ქვეყნის თასის გათამაშებას, რომელსაც ბოლო ხუთი წლის განმავლობაში იგებდა. ტომას ტუხელის გუნდი, საკუთარ „პარკ დე პრენსზე,“ მეოთხედფინალში, ლიგა 1-ის აუტსაიდერ „გენგამთან“ 1:2 დამარცხდა. ამ ისტორიას კიდევ უფრო საინტერესოს ის ფაქტი ხდის, რომ სტუმრებმა მეორე ტაიმში სამი პენალტი დაარტყეს.

ვერ ვიტყვით, რომ ტუხელი ქვეყნის თასს უპატივცემულოდ მოექცა. შემადგენლობაში ყველა ვარსკვლავი თამაშობდა, ნეიმარისა და კილიან მბაპეს ჩათვლით. აქ ალბათ, უფრო მეტოქის შეუფასებლობასთან უნდა გვქონდეს საქმე.

პირველი პენალტი, სტუმარმა მარკუს ტიურამმა (საფრანგეთის ნაკრების ყოფილი ვარსკვლავის, ლილიან ტიურამის ვაჟი) გააცუდა, ბურთი კარს ააცილა. ვერ გაიტან, გაგიტანენო და მაშინვე მასპინძლები დაწინაურდნენ, ტომა მენიემ ნეიმარს უპასა და ბრაზილიელმაც თავურით დალაშქრა სტუმართა კარი.

თუმცა, გენგამელებმა საწადელს მაინც მიაღწიეს. მსაჯმა კიდევ ორი თერთმეტმეტრიანი დანიშნა პარიზელთა კარში და ამჯერდ სტუმრები ზუსტნი აღმოჩდნენ. ჯერ იენი ატიტო ნგაბკოტომ იყოჩაღა, შემდეგ იმავე ტიურამმა.

ეს პარიზელთა მეორე წაგებაა წლევანდელი სეზონის 27 მატჩში. პირველად ისინი „ენფილდზე“ „ლივერპულთან“ დამარცხდნენ ჩემპიონთა ლიგის შეხვედრაში.