ინგლისური „ლივერპულის“ მთავარი მწვრთნელი იურგენ კლოპი ამბობს, რომ პრემიერლიგის მოსაგებად 100 ქულაზე მეტის მოპოვებაა საჭირო. როგორც გერმანელმა „ვულვზთან“ (2:0) გამარჯვების შემდეგ განაცხადა, ზეიმი ჯერ ადრეა.

„ჯერჯერობით განსაკუთრებული სეზონია. 18 თამაშში 48 ქულა მოვიპოვეთ. მაგრამ, სხვა გუნდებიც არიან. „ჩელსი“, „სიტი“, „ტოტენჰემი“, „არსენალი“ ალბათ მოიგებენ თავიანთ მატჩებს და 40 ქულაზე მეტი მათაც ექნება. სავარაუდოდ, ჩემპიონობისთვის 105 ქულის დაგროვება იქნება საჭირო.

ვიცით, რომ კარგ ფორმაში ვართ და კარგი პერიოდი გვაქვს, თუმცა, ახლა ზეიმის ან ზაფხულში გასამართი ზეიმისთვის მზადების დრო არაა. მხოლოდ იმაზე უნდა ვიფიქროთ, როგორ აღვიდგინოთ ენერგია სწრაფად, რომ „ნიუკასლთან“ მატჩისთვის მზად ვიყოთ“, - განაცხადა კლოპმა.

შეგახსენებთ, რომ „ლივერპულმა“ პრემიერლიგის 18 ტურში 15 მატჩი, 3-ჯერ ფრე ითამაშა და არ დამარცხებულა. 48 ქულით „წითლები“ სატურნირო ცხრილის სათავეში იმყოფებიან.