სკანდალით დასრულდა გურამ თუშიშვილის ასპარეზობა ყაზახეთის ქალაქ ალმატიში გამართულ შეჯიბრზე. ქართველმა ძიუდოისტმა ძალები ყაზახურ ჭიდაობაში მსოფლიო ჩემპიონატზე სცადა, თუმცა, ნახევარფინალში დამარცხდა და პროტესტის ნიშნად, აღარც მე-3 ადგილისთვის შეხვედრაზე გასულა.

თუშიშვილი, რომელიც მსოფლიოს მოქმედი ჩემპიონი გახლავთ, აღნიშნულ ტურნირზე შარშანაც იმყოფებოდა და მაშინ გადამწყვეტი შერკინება მასპინძელ აიბეკ ნუგიმაროვთან წააგო.
ბედის ირონიით, ქართველი ძიუდოისტი გოლიათ ყაზახს უკვე ნახევარფინალში გადაეყარა და რევანშის შანსი მიეცა, თუმცა, ტატამი ისევ დამარცხებულმა, ამჯერად, უკვე სკანდალით დატოვა, რასაც ყაზახურ პრესაში არცთუ კარგი გამოხმაურება მოჰყვა.
აღსანიშნავია, რომ გურამმა ყოჩაღად დაიწყო და უკვე მე-40 წამისთვის ყაზახური ჭიდაობისთვის მინიმალური შეფასება – “ბუკი” 2-ჯერ ჰქონდა აღებული, შერკინების დასრულებამდე კი კულმინაციური მომენტი ვიხილეთ.
თუშიშვილის მეტოქე თითქოს ტატამიდან ჰყავდა გაყვანილი, როდესაც ნუგიმაროვმა ჩვენებურის წამიერი მოდუნებით ისარგებლა და ეფექტური გდება შეასრულა. შეხვედრის არბიტრმა ეს ილეთი “ჟარტილაით” შეაფასა, რომელიც ძიუდოს ენაზე ვაზარის უტოლდება, თუმცა, მაგიდის მსაჯებთან კონსულტაციის შემდეგ, მასპინძელს წმინდა გამარჯვება მიანიჭა.
ამან თუშიშვილის მძაფრი პროტესტი გამოიწვია და მისი მოთხოვნით დიდ ეკრანზე ეპიზოდი კიდევ რამდენჯერმე გაამეორეს. ქართველი ძიუდოისტი დარწმუნებული იყო, რომ ტატამისთვის ორივე ბეჭი არ შეუხია, თუმცა, მისი აზრი გათვალისწინებული არ იქნა.
აღნიშნულის გამო, გურამი წყობიდან გამოვიდა, მსაჯებისა და ადგილობრივი გამომცხადებლის მოწოდება არ შეისმინა, მეტოქესა და არბიტრს ხელი არ ჩამოართვა და ცხადია, ყაზახისთვის გამარჯვებაც არ მიულოცია. მეტიც, თუშიშვილმა შეჯიბრის გაგრძელებაზე უარი განაცხადა და ბრინჯაოს მედალი რუს რომან ბობიკოვს უბრძოლველად დაუთმო.
ცნობისთვის, მსოფლიო ჩემპიონატი ყაზახურ ჭიდაობაში პირველად 2014 წელს პავლოდარში ჩატარდა და ის ცნობილმა კუბელმა ძიუდოისტმა ოსკარ ბრაისონმა მოიგო.
წლეულს, თუშიშვილის გარდა, შეჯიბრში ყაზახი, მონღოლი, რუსი, სომეხი, ებრაელი, ჩეხი, პოლონელ, ერაყელი, აზერბაიჯანელი, ახალზელანდიელი, განელი, უზბეკი, ლიტველი და კამერუნელი სპორტსმენები ჩაებნენ.
მათ შორის ძირითადად ძიუდოისტები და მოჭიდავები იყვნენ, ზელანდიელებმა კი ტურნირზე გოლიათი სუმოისტი ჩიკო რერემოანუ პემბერტონი (სიმაღლე 2 მ. წონა 170 კგ.) წარადგინეს.
ვთქვათ ისიც, რომ ნახევარფინალამდე, თუშიშვილმა მონღოლ სერიკ ბერდიმურატს, ჩეხ ლუკაშ ჰლავაჩეკსა და ყაზახ აიბატ სეიტენს საქმე ვადაზე ადრე მოუთავა, შემდეგ კი, აიბეკ ნუგიმაროვთან დრამატული ორთაბრძოლა იყო... ვთქვათ ისიც, რომ ამ უკანასკნელმა ფინალშიც იმარჯვა, ტიტული შეინარჩუნა და სოლიდური საპრიზო ფონდიდან 10 მილიონი ყაზახური ტენგე მიიღო, რაც დაახლოებით 23 720 ევროა.