მაკედონიის დედაქალაქი სკოპიე ევროპის ჩემპიონატს მასპინძლობს ბლიცსა და რაპიდში, სადაც საქართველო ერთადერთი მოჭადრაკითაა წარდგენილი.

ჩვენი ქვეყნის ღირსებას ბულგარელი ივან ჩეპარინოვი (2618) იცავს, რომელმაც ქართული მოქალაქეობა არცთუ დიდი ხნის წინ მიიღო.
შეჯიბრის საწყისი 2 დღე ბლიცს ეთმობა. მონაწილეებმა უკვე მოითავეს 10 ტური, ჩეპარინოვი კი, რომელსაც მე-18 განთესვა აქვს, დამატებითი მაჩვენებლებით, მხოლოდ 64-ე ადგილზე იმყოფება.
ივანმა ტურნირი ზედიზედ 4 მოგებით დაიწყო, თუმცა, მომდევნო ექვს პარტიაში 2-ჯერ იმარჯვა, 3-ჯერ წააგო და 1 პარტია ყაიმით დაასრულა. ამგვარად, მის აქტივში 6.5 ქულაა.
სულ, ბლიცში 22 ტურია დაგეგმილი და გამარჯვებულის ვინაობას დღეს შევიტყობთ. ამ დროისთვის, ლიდერები რუსი ვლადისლავ არტემიევი (2825) და ესპანელი ივან ლოპეს სალგადო (2513) არიან, რომელთა აქტივშიც 9.5-9.5 ქულაა.
საერთო ჯამში, ევროპის ჩემპიონატში 324 მოჭადრაკეა ჩართული.