სხვა

0:29 | 19.11.2018 | ნანახია [] - ჯერ

საქართველოს მოფარიკავეთა ნაკრები რვა საუკეთესოს შორის მოხვდა

ხმლით ფარიკაობაში საქართველოს ნაკრებმა (სანდრო ბაზაძე, ბექა ბაზაძე, მიხეილ მარდალეიშვილი, ვაჟა რეჭია) ალჟირში გამართულ მსოფლიო თასზე მე-8 ადგილი დაიკავა.

ჩვენმა გუნდმა საწყის რაუნდში სენეგალის ნაკრებს იოლად – 45:13 სძლია, მერვედფინალში კი დრამატულ შეხვედრაში, რომელიც საათზე მეტ ხანს გაგრძელდა, საკმაოდ ძლიერი საფრანგეთს 45:43 მოუგო.
მეოთხედფინალში საქართველოს ნაკრების მეტოქე მსოფლიოს ერთერთი საუკეთესო გუნდი, გუნდური რეიტინგის მეორე ნომერი, უძლიერესი შემადგენლობით მოასპარეზე იტალია იყო, რომელმაც ჩვენებურებს 45:37 სძლია.
შედეგად, ქართველი მოფარიკავეები მეხუთე-მერვე ადგილებისთვის ბრძოლაზე გადაერთნენ, სადაც ჯერ – უნგრეთთან, შემდეგ კი, ირანთან ერთნაირი ანგარიშით – 41:45 დამარცხდნენ.
შეიძლება ითქვას, რომ გუნდურ ასპარეზობაში პროგრამა მინიმუმი შესრულდა, რადგანაც საქართველოს ნაკრები რვა საუკეთესოს შორის მოხვდა, რეიტინგში კი, სავარაუდოდ, საფრანგეთს გაუცვლის ადგილს და მე-8 პოზიციაზე გადაინაცვლებს.
შეგახსენებთ, რომ ინდივიდუალურ შეჯიბრში, სანდრო ბაზაძემ 161 მონაწილეს შორის მე-6 ადგილი დაიკავა და საკუთარ აქტივს 14 სარეიტინგო ქულა შემატა. სავარაუდოა, რომ განახლებულ კლასიფიკაციაში ის ორი ადგილით დაწინაურდება და მსოფლიოში 23-ე იქნება. რეიტინგში წინსვლა ექნება ვაჟა რეჭიასაც.
ხმლით ასპარეზობაში სეზონის მნიშვნელოვანი შეჯიბრებები, მსოფლიო თასი, გრან პრი, ევროპისა და მსოფლიო ჩემპიონატები მომავალ – 2019 წელს გაიმართება.

0.145757