ბუენოს აირესში მიმდინარე ახალგაზრდულ ოლიმპიურ თამაშებზე საქართველოს ხუთმა სპორტსმენმა უკვე დაამთავრა ინდივიდუალური შეჯიბრება, რომელთაგან სამმა მედალი აიღო: ილია სულამანიძემ (ძიუდო) და არჩილ მალაყმაძემ (ძალოსნობა) ვერცხლი დაისაკუთრეს, ნინო ხუციბერიძემ (ტყვიის სროლა) - ბრინჯაო. საქართველოს ეროვნული ოლიმპიური კომიტეტის პრეზიდენტს ლერი ხაბელოვს იმედი აქვს, რომ პრიზიორთა რიგები შეივსება და საქართველოს სპორტული დელეგაცია შეძლებს წინა თამაშების შედეგების გაუმჯობესებას და, რაც მთავარია, ისტორიული პირველი ოქროს მედლის მოპოვებას.
„ჩვენ უკვე გავუტოლდით ჩინეთში გამართული 2014 წლის ახალგაზრდული ოლიმპიადის შედეგს, სადაც ასევე ორი ვერცხლი და ერთი ბრინჯაო გვერგო, მაგრამ ჯერჯერობით არ გვყავს ჩემპიონი. ამ მიზანთან ყველაზე ახლოს იყო ძიუდოისტი ილია სულამანიძე, რომელმაც საკვალიფიკაციო შეხვედრები მღალ დონეზე ჩაატარა, ფინალშიც უფრო აქტიური იყო, მაგრამ წამიერმა მოდუნებამ შანსი ხელიდან გამოაცალა. ამ ეტაპზე თავისი მაქსიმუმი აჩვენა ძალოსანმა არჩილ მალაყმაძემ. მას ტრავმა აწუხებდა და ბოლო დღეებში მთელი დატვირთვით ვერ ვარჯიშობდა, თუმცა მაინც შეძლო ძალების მობილიზება და მხოლოდ ძლიერ თურქ მეტოქეს ჩამორჩა. ახალგაზრდულ ოლიმპიადაზე აღებული ვერცხლის მედალი ძალზე მნიშვნელოვანი წარმატებაა. ასევე მინდა მესამე ადგილი და ბრინჯაოს მედალი მივულოცო ტყვიის მსროლელ ნონო ხუციბერიძეს, რომელიც უდაოდ ნიჭიერი სპორტსმენია და, იმედია, მომავალშიც არაერთხელ გაგვახარებს.
რაც შეეხება ამ ოლიმპიადაზე ჩვენი სპორტსმენების მონაწილეობით ჯერ კიდევ გასამართ შეჯიბრებებს, რა თქმა უნდა, პირველ რიგში, ჩვენი მოჭიდავეების წარმატების იმედი გვაქვს. სამივე მათგანს შეუძლია ჩემპიონობისთვის იბრძოლოს"- აღნიშნა ლერი ხაბელოვმა.
www.geonoc.org.ge
