ევროპის ძალოსნობის ფედერაციის (EWF) გენერალური მდივანი, დოქტორი ჰასან აკუში და ევროსპორტის ტექნიკური დირექტორი დევიდ გოლდსტრომი ბათუმში 3 დღის განმავლობაში იმყოფებოდნენ. სტუმრებს მეგზურობა ძალოსნობის ეროვნული ფედერაციის პრეზიდენტმა კახი კახიაშვილმა და ვიცე-პრეზიდენტებმა ნოდარ სირბილაშვილმა და დავით ყიფშიძემ გაუწიეს.

საქართველოს ძალოსნობის ეროვნული ფედერაციის პრესსამსახურის ცნობით, სამუშაო ვიზიტის ფარგლებში კომისიის წევრებმა ბათუმის ინფრასტრუქტურა და ადგილობრივი ღირსშესანიშნაობები დაათვალიერეს, ასევე რამდენჯერმე იმყოფებოდნენ ბათუმის ახლადაშენებული სპორტსკოლის დარბაზში, სადაც ტოკიოს 2020 წლის ოლიმპიური თამაშების სალიცენზიო ევროპის ჩემპიონატი უნდა გაიმართოს.
ჰასან აკუშს და დევიდ გოლტსრომს სამუშაო ვიზიტის ფარგლებში საქართველოს ძალოსნობის ფედერაციის ხელმძღვანელებთან ერთად შეხვედრები ჰქონდათ ბათუმის ვიცე-მერი თენგიზ პეტრიძესთან, აჭარის ა.რ განათლების, კულტურისა და სპორტის მინისტრ ინგა შამილიშვილთან, ასევე აჭარის სპორტისა და ახალგაზრდობის საქმეთა დეპარტამენტის უფროსის მოადგილე მინდია ქათამაძესთან. მხარეებმა შეხვედრაზე სამომავლო გეგმებსა და ჩემპიონატის ჩატარების დეტალებზე ისაუბრეს.
ძალოსნობის კომისიის წევრებმა აღნიშნეს, რომ მათთვის საქართველოში, კერძოდ ბათუმში ოლიმპიური სალიცენზიო ჩემპიონატის ჩატარების გადაწყვეტილება საკმაოდ მარტივი და კომფორტული აღმოჩნდა, ვინაიდან ისინი თვლიან, რომ საქართველო წამყვანი ქვეყანაა სპორტის ამ სახეობაში.
სტუმრებმა საქართველო დღეს დილით დატოვეს. “ბათუმი 2019“-ის კომისია, შესაძლოა, ბათუმს იანვარში კვლავ ესტუმროს.