ქართველმა მოციგურავე მორის ყვითელაშვილმა მორიგ წარმატებას მიაღწია. ეს ფინეთის ქალაქ ესპოოში მოხდა, სადაც 4-7 ოქტომბერს ჩელენჯერის სერიის ტურნირი გაიმართა.

ყოველწლიურად, ამ რანგის შეჯიბრებებში ცნობილი მოციგურავეები მონაწილეობენ, რომლებიც თავიანთ ახალ პროგრამებს წარმოადგენენ და მსოფლიო სარეიტინგო სიაში საკუთარ პოზიციებს იმყარებენ.
ახალ სეზონში, ყვითელაშვილისათვის ეს რიგით მეორე საერთაშორისო ტურნირი იყო სლოვაკეთის ჩელენჯერის შემდეგ, სადაც მორისმა ონდრეი ნეპალას სახელობის ტურნირზე 23 მონაწილეს შორის მეოთხე ადგილი დაიკავა.
ფინეთში ჩატარებულ ტურნირზე ვაჟთა კატეგორიაში 17 ქვეყნის 21 სპორტსმენი ჩაერთო, მათ შორის საკმაოდ ტიტულოვანი მოციგურავეები რუსეთიდან, კანადიდან, იტალიიდან, აშშ-დან, იაპონიიდან და სამხრეთ კორეიდან.
ყვითელაშვილმა ორივე პროგრამაში საკმაოდ საინტერესოდ იასპარეზა. ქართველმა სპორტსმენმა მოკლე პროგრამაში მე-5 შედეგი აჩვენა, თავისუფალში კი – მე-3 და ჯამური 231.19 ქულით ჯამური მაჩვენებლითაც მე-3 იყო. მორისი მხოლოდ რუს მიხაილ კოლიადასა (250.58) და სამხრეთკორეელ ჯუნჰვან ჩას (239.19) ჩამორჩა და ბრინჯაოს მედალს დაეპატრონა.
საქართველოს ფიგურული ციგურაობის ფედერაციის სტატისტიკურ ნუსხაში, ეს ამ ამ სეზონზე უკვე მეორე მედალია ქართველი მოცეკვავე წყვილის – მარია კაზაკოვასა და გიორგი რევიას ვერცხლის შემდეგ.
აღსანიშნავია, რომ ფინეთში ვაჟთა კატეგორიაში გამოსვლებს მსაჯობდა საერთაშორისო კატეგორიის მსაჯი სალომე ჩიგოგიძე, რომელიც საერთაშორისო საციგურაო კავშირის ეგიდით ორგანიზებულ ყველა ტურნირზეა ხოლმე მიწვეული.
ვთქვათ ისიც, რომ შემდეგი ტურნირი, სადაც მორის ყვითელაშვილი საქართველოს ღირსებას დაიცავს, ამერიკის შეერთებული შტატების ქალაქ ევერეტში შედგება. იქ, 19-22 ოქტომბერს გრან-პრის პირველი ეტაპი გახლავთ დაგეგმილი.