საქართველოს ეროვნული ლიგის 28-ე ტურის შემდეგ ლიდერთა შორის სიტუაცია უცვლელი დარჩა. „საბურთალოს“ გამარჯვებას თბილისის „დინამომ“ გამარჯვებითვე უპასუხა და შედეგად, 5-ქულიანი სხვაობა შენარჩუნდა.

„დინამომ“ სეზონის დასკვნითი მეოთხე წრე „რუსთავთან“ მატჩით დაიწყო და ადვილად შეძლო 3 ქულის მოპოვება. ყველაფერი პირველივე ტაიმში გაირკვა, როდესაც აკაკი შულაიამ და ბუდუ ზივზივაძემ მასპინძელთა კარი ორჯერ დალაშქრეს. ზივზივაძემ მეორე ტაიმში დუბლიც გაიფორმა და საბოლოო ანგარიში დააფიქსირა - 0:3.

ქუთაისის „ტორპედო“ კი ევროზონაში ადგილის გამყარების ნაცვლად მეხუტე ადგილზე ჩამოქვეითდა. საქართველოს ჩემპიონი გორში ჩავიდა, სადაც უშუალო კონკურენტ „დილას“ გაეჯიბრა და ოთხი დღის წინანდელისგან განსხვავებით, ამჯერად ვერ აჯობა. „თენგიზ ბურჯანაძის“ სტადიონზე ყველაზე საინტერესო მოედანზე ძაღლის გამოჩენა გახლდათ და მატჩიც ლოგიკურად, უგოლოდ დასრულდა.

„დილა“ – „ტორპედო“ 0:0 (0:0)

„რუსთავი“ – „დინამო“ 0:3 (0:2)

გოლები: 0:1 შულაია (31), 0:2 ზივზივაძე (45), 0:3 ზივზივაძე (80)