იტალიური „მილანის“ ყოფილი ლიდერები სილვიო ბერლუსკონი და ადრიანო გალიანი ფეხბურთში დაბრუნდნენ. ბერლუსკონიმ იტალიის სერია C-ს კლუბის, "მონცას" აქციების 100% შეიძინა, ხოლო გენერალური დირექტორის პოსტზე ადრიანო გალიანი დაინიშნა.

სწორედ 74 წლის გალიანიმ გამართა პრესკონფერენცია. საინტერესოა, რომ ადრიანო სწორედ მონცაში დაიბადა და შესაბამისად, მშობლიურ გუნდში დაიწყო მუშაობა:

„ძალიან ემოციური დღეა ჩემთვის. მადლობა ბერლუსკონის, რომ ჩემს საყვარელ გუნდში დაბრუნების შესაძლებლობა მომცა. 31 წელი „მილანში“ იჯარით ვიყავი და ახლა სახლში დავბრუნდი. ჩემი ცხოვრება ბერლუსკონის გარეშე სხვანაირი და ნაკლებად საინტერესო იქნებოდა. არცერთ სხვა გუნდში არ გადავიდოდი, მხოლოდ „მონცას“ დავთანმხდი.

კაკა? კლუბის მომავლის შესახებ მხოლოდ ბერლუსკონი ისაუბრებს. ეს ყველაფერი 31 აგვისტოს დაიწყო, როდესაც ჩვენს შორის სატელოფონო საუბარი შედგა.

ჩვენი მიზანი? გაცილებით ადვილია სერია B-დან სერია A-ში გადასვლა, ვიდრე სერია C-დან სერია B-ში. ვიმედოვნებთ, რომ ორ წელიწადში „მილანი“ – „მონცას“ დერბი გაიმართება. ჩვენ გვყავს კარგი თავდამსხმელი, მეკარე, მწვრთნელი, სპორტული დირექტორი, ჯერჯერობით ტრანსფერებზე ვერ ვისაუბრებ, მაგრამ რა თქმა უნდა, არ შეგვიძლია „მონცაში“ მესი ვიყიდოთ“, - განაცხადა გალიანიმ პრესკონფერენციაზე.

„მონცა“ ამჟამად სერია С-ში ასპარეზობს, სადაც 3 ტურის შემდეგ 9 ქულით პირველ პოზიციაზე იმყოფება. იტალიის ელიტაში გადასასვლელად ლომბარდიულ კლუბს ორი დივიზიონით აღზევება სჭირდება.