1988 წლის 27 სექტემბერს ვლადიმერ აფციაური ოლიმპიური ჩემპიონი გახდა. სამხრეთ კორეის დედაქალაქში რაპირით მოფარიკავეთა გუნდური შეჯიბრი 27 სექტემბერს გაიმართა, ვლადიმერ აფციაურმა საბჭოთა კავშირის ნაკრების გამარჯვებაში მნიშვნელოვანი წვლილი შეიტანა.

ჯგუფურ ეტაპზე, საბჭოთა გუნდმა სამივე შეხვედრა დამაჯერებლად მოიგო, ჰონ კონგთან 9-0 (აფციაურმა ორი შეხვედრა ჩაატარა და ორივე 5-0 მოიგო), კანადასთან 9-1 (აფციაური ამჯერად სამჯერ გამოვიდა ბილიკზე და სამივე შეხვედრა მოიგო) და პოლონეთთან 9-3 (აფციაურმა სამიდან ორში გაიმარჯვა).

მეოთხედფინალში საბჭოთა კავშირის ნაკრებმა ჩინეთს 9-5 (აფციაურმა ორი შეხვედრა ჩაატარა და ორივეში ერთნაირი ანგარიშით 5-2 გაიმარჯვა) მოუგო.
ნახევარფინალი უნგრელებთან 8-8 დასრულდა, თუმცა ჩხვლეტების უკეთესი შეფარდებით ფინალში საბჭოთა გუნდი გავიდა. ვლადიმერ აფციაურმა ოთხი შეხვედრა ჩაატარა: იშტვან სელეი 5-1, რობერტ გატაი 5-0, პალ სეკერეში 5-0, ზოლტ ერკეში 2-5.
ფინალში კი გერმანიის ფედერაციული რესპუბლიკის ნაკრები 9-5 დაამარცხეს, ვლადიმერ აფციაურმა სამივე შეხვედრა მოიგო, რამაც მნიშვნელოვნად განაპირობა რაპირაში გუნდური ჩემპიონობა. ქართველმა მოფარიკავემ ჯერ ულრიხ შრეკი 5-2, შემდეგ ტორსტენ ვაიდნერი 5-4, ბოლოს კი მატიას გაი 5-1 დაამარცხა.
ვლადიმერ აფციაური მეორე ქართველი მოფარიკავე გახდა, ნუგზარ ასათიანის შემდეგ, რომელმაც ოლიმპიური ოქრო მოიპოვა.

საქართველოს ფარიკაობის ფედერაციის პრესსამსახური