ჯანო ანანიძე დაბრუნდა. დაბრუნდა ზუსტად ექვსი თვის შემდეგ. დიახ, ანანიძემ, რომელმაც ვარჯიში აქამდეც დაიწყო, პირველი ოფიციალური თამაში ჩაატარა მიმდინარე წლის მარტის შემდეგ.
მოსკოვის „სპარტაკმა“ რუსეთის თასის 1/16 ფინალში ნოვოროსისკის „ჩერნომორეცი“ სტუმრად ზე ლუიშის გოლით დაამარცხა და შემდეგ ეტაპზე გავიდა.
რაც შეეხება ჩვენებურს - ჯანო მოედანზე 83-ე წუთზე გამოჩნდა და თავის გამოჩენაც შეეძლო. 89-ე წუთზე მისი სახიფათო დარტყმა მასპინძელთა მეკარე შვაგირევმა ეფექტურ ნახტომში მოიგერია. თუმცა, ეს არაფერი, მთავარია ანანიძე მინდორს დაუბრუნდა და ეს უდაოდ პოზიტიური ცნობაა საქართველოს ნაკრებისთვის, რომელსაც ოქტომბერში ერთა ლიგის ორი მნიშვნელოვანი თამაში ელოდება.
შეგახსენებთ, ჯანო ანანიძე მარტის თვეში საქართველოსა და ლიეტუვას ამხანაგური მატჩისას მძიმედ დაშავდა და მას შემდეგ ლაზარეთში იყო.
