საქართველოს ძიუდოისტთა ნაკრების წევრი ვარლამ ლიპარტელიანი ბაქოში მიმდინარე მსოფლიოს ჩემპიონატზე, ფინალის საგზურის მოსაპოვებლად მონღოლ ოტგონბაატარ ლხაგვასურენს დაუპირისპირდება.
100 კილოგრამი წონითი კატეგორიის მსოფლიოს რეიტინგის ქართველმა ლიდერმა დილის პროგრამა ფრანგი ალექსანდრე იდირის ძლევით გახსნა. მერვედფინალში აზერბაიჯანელ ელმარ გასიმოვს აჯობა, ხოლო მეოთხედფინალში – ეგვიპტელ რამადან დარვიშს.
მეორე ნახევარფინალში ერთმანეთს სამხრეთკორეელი გუამ ჩო და რუსეთის ნაკრების წევრი ნიაზ ილიასოვი დაეჭიდებიან.
ვარლამ ლიპარტელიანი ოტგონბაატარ ლხაგვასურენს აქამდე ორჯერ შეხვდა და ორჯერვე მოუგო. პირველად 2016 წელს, რიო დე ჟანეიროს ოლიმპიური თამაშების მეოთხედფინალში, როდესაც ორივე 90 კილოგრამ წონით კატეგორიაში გამოდიოდა. მეორე ბრძოლა კი წლეულს, თებერვალში შედგა, დიუსელდორფის გრან სლემის მეოთხედფინალში.
მსოფლიოს ჩემპიონატზე ფინალური ბლოკის შეხვედრები თბილისის დროით 16:00 საათზე დაიწყება.
