ქართველმა სუმოისტმა ლევან გორგაძემ იგივე ტოჩინოშინმა ტოკიოს “რიოგოკუ კოკუგიკანში” გამართული სექტემბრის სუპერტურნირი 9 მოგებითა და 6 მარცხით დაასრულა.

შეგახსენებთ, რომ ტოჩინოშინი აკი ბაშოს კადობანში ჩაყენებული შეხვდა, რაც იმას ნიშნავდა, რომ ოძეკის მაღალი წოდების შესანარჩუნებლად უცილობლად დადებითი ბალანსის (კაში-კოში) დაფიქსირება სჭირდებოდა.
საბედნიეროდ, ქართველმა სეკიტორმა მიზნის მიღწევა მოახერხა. საშემოდგომო სუპერტურნირის დასკვნით დღეს ტოჩინოშინი ასევე ოძეკი ტაკაიასუს გაეჯიბრა (VIDEO)და ოკურიდაშით სძლია.
დაუმარცხებლად დაასრულა ასპარეზობა მონღოლმა იოკოძუნა ჰაკუჰომ. “თეთრმა ფენიქსმა” მიჯრით მე-15 გამარჯვება ასევე იოკოძუნა კაკურიუსთან იზეიმა და ელიტარულ მაკუუჩი დივიზიონში ათასმოგებიან ზღვარს გადააბიჯა. ვთქვათ ისიც, რომ რიგით 69-ე იოკოძუნამ “იმპერატორის თასი” 41-ედ შემართა.
რანგით მე-2 დივიზიონ ჯურიოში ასპარეზობა მხოლოდ 6 გამარჯვებით დაასრულა გაგამარუს შიკონათი ცნობილმა თეიმურაზ ჯუღელმა. შეგახსენებთ, რომ ქართველი გოლიათი აღმოსავლეთის მე-12 ნომრის წოდებით ირჯებოდა, ამდენად, მორიგი მაკე-კოში მისი მაკუშიტაში დაქვეითების მომასწავებელი უნდა იყოს. აკი ბაშოს ბოლო დღეს გაგამარუ აღმოსავლეთის მე-4 რეიტინგოსან დაიამამისთან იორიკირით დამარცხდა.