საქართველოს ძიუდოისტთა ახალგაზრდული ნაკრებისთვის სოფიაში მიმდინარე ევროპის ჩემპიონატის მეორე დღე პირველზე გაცილებით წარმატებული გამოდგა. ჯაბა პაპინაშვილისა (60 კგ) და ბაგრატ ნინიაშვილის (66 კგ) მიერ გუშინ მოპოვებულ ბრინჯაოს მედლებს, დღეს ოქრო, 2 ვერცხლი და ბრინჯაო დაემატა.

81 კილოგრამი წონითი კატეგორიის ევროკონკურენცია ქართული ფინალით დაგვირგვინდა. ლუკა მაისურაძე კვარცხლბეკის უმაღლეს საფეხურზე ავიდა, ხოლო ტატო გრიგალაშვილი – მეორეზე. გოგონათა ნაკრების წევრმა ეთერ ლიპარტელიანმაც (57 კგ) ფინალში იჭიდავა და უმაღლეს ტიტულამდე ცოტა დააკლდა. მარიამ ჭანტურიამ (70 კგ) კი მესამე საპრიზო ადგილი დაიკავა.

20 წლის ლუკა მაისურაძე ახალგაზრდული ევროპირველობის ფინალში ზედიზედ მეორედ გავიდა. შარშან ვერცხლს დასჯერდა. ამჯერად კი ოქროთი გაიხარა. ქართული დაპირისპირების ბედი "ოქროს დროში” შესრულებული ვაზარით გადაწყდა. ბულგარულ ტატამზე, გრიგალაშვილთან დაჭიდებამდე მაისურაძემ ოთხი მეტოქე დაამარცხა: ბოსნიაჰერცეგოვინელი ვუკ ელეზი, ესტონელი ასლანბეგ მაგომედკერიმოვი, პორტუგალიელი მიგელ ალვეში და იტალიელი კრისტიან პარლატი.

18 წლის ტატო გრიგალაშვილმაც ოთხი მეტოქე ჩამოიშორა: გერმანელი ემილ ჰენიბახი, ჰოლანდიელი იან რეინტიენსი, უნგრელი რობერტ რაჟკარი და აზერბაიჯანელი მურად ფატიევი.

გრიგალაშვილმა ახალგაზრდებს შორის შარშანაც ისახელა თავი – ევროპისა და მსოფლიოს პირველობებზე 73 კილოგრამ წონით კატეგორიაში მოპოვებული ბრინჯაოს მედლებით. ამჯერად ერთი წონით მაღლა აჩვენა უკეთესი შედეგი.

გოგონათა 57 კილოგრამ წონით კატეგორიაშიც ორი ქართველი ჩაება კონკურენციაში. კადეტებს შორის ევროპის ჩემპიონმა (2015) მზია ბებოშვილმა შეჯიბრება ავსტრიელი ლისა გრაბნერის ძლევით გახსნა და მერვედფინალში სერბ მარიცა პერიშიჩთან დამარცხდა. ასევე კადეტებში ევროპის ჩემპიონმა (2016) ეთერ ლიპარტელიანმა კი დილის პროგრამა წაუგებლად ჩაამთავრა. 18 წლის ძიუდოისტმა ფინალის გზაზე იპონ-იპონ ჩამოიშორა მაკედონიელი ბერნა შერიფოვსკა, ბრიტანელი ასელია ტოპრაკი, გერმანელი კაროლინ ფრიცი და ფრანგი მერილინ ლუის სიდნი.

საჩემპიონო ბრძოლაში ეთერ ლიპარტელიანი კიდევ ერთ ფრანგთან – სარა ლეონი ცისიქთან ვეღარას გახდა და მეორე საპრიზო ადგილს დასჯერდა.

მარიამ ჭანტურიამ ძირითად ბადეში ბერძენი არისტეა-იოანა დიმოუსა და ჩერნოგორიელი ჯოვანა პეკოვიჩის იოლად ძლევის შემდეგ, მეოთხედფინალში უილეთო ბრძოლაში, გაფრთხილებით წააგო ჰოლანდიელ მარჯიტ დე ვოგდთან და რეპეშაჟში გადაერთო. "ბრინჯაოს ნახევარფინალში” შვედ იდა ერიკსონს აჯობა ვაზარით. გადამწყვეტ ბრძოლაში კი დე ვოგდის ჯავრი მის თანამემამულეზე – ჯესიკა გორისენზე იყარა.

ევროპის ახალგაზრდულ ჩემპიონატზე ინდივიდუალურ შეჯიბრებაში მედლების გათამაშება ხვალ დასრულდება. საქართველოს სახელით იჭიდავებენ: ლაშა ბექაური (90 კგ), ონისე სანებლიძე, ზაურ კენჭაძე (ორივე 100 კგ), გელა ზაალიშვილი (+100 კგ) და სოფიო სომხიშვილი (+78 კგ).