კალათბურთი

23:12 | 13.09.2018 | ნანახია 7323 - ჯერ

შანსი არის - საქართველომ ისრაელი დაამარცხა!

საქართველოს საკალათბურთო ნაკრებმა მსოფლიოს 2019 წლის ჩემპიონატზე მოხვედრის შანსი შეინარჩუნა! ილიას ზუროსის გუნდმა მეორე შესარჩევი ეტაპი თელ-ავივში დაიწყო, სადაც ისრაელის ნაკრებს დაუპირისპირდა და მეტად დაძაბულ შეხვედრაში დაამარცხა.

უნდა ითქვას, რომ სტუმრებმა აბსოლუტურად დამსახურებულად გაიმარჯვეს. ქართველი კალათბურთელები სათამაშო დროის 30 წუთი უპირატესობას ფლობდნენ და შესაბამისად, სასურველ შედეგსაც უწიეს. პირველი მეოთხედი დაძაბული გამოდგა, თუმცა საქართველოს ნაკრების ჩინებული თამაში პერიმეტრზე გადამწყვეტი გამოდგა და შედეგად 9-დან 6 ჩაგდებული სამქულიანით ზუროსის ბიჭებმა 26:23 მოიგეს საწყისი 10 წუთი.

კიდევ უფრო გაიზარდა სხვაობა მეორე პერიოდში. საერთოდ, მეორე ათწუთეული საქართველოს ნაკრების საუკეთესო მონაკვეთი გამოდგა შეხვედრაში (ბოლო პერიოდთან ერთად), რადგან მეტოქეს 9 ქულით აჯობა და დიდ შესვენებაზე მეტად კომფორტული უპირატესობით, +12 ქულით გავიდა.

გამოსარჩევი იყო თორნიკე შენგელიას, მატ ჯენინგისა და გოგა ბითაძის კარგი თამაში. თუმცა, კალათბურთში 12 ქულა რომ არაფერს ნიშნავს, ეს დღესაც დამტკიცდა. მეორე ტაიმი ისრაელის ნაკრებმა აგრესიულად და ძალზე შედეგიანად დაიწყო. ქართველები ვერ ახერხებდნენ მეტოქის შეჩერებას და ამასთან, შეტევაში შორეული ტყორცნებიც აღარ მისდიოდათ. შედეგად, 12 ქულა თვალსა და ხელსშუა გაქრა და მასპინძლები წინაც გავიდნენ. ეს დიდწილად, ტამირ ბლატის დიდებული გარჯის შედეგი გახლდათ, რომელმაც სამქულიანებიც ჩააგდო და შედეგიანი გადაცემები გვარიანად დაარიგა.

საინტერესოა, რომ ისრაელმა პირველი ტაიმი 37 ქულით დაასრულა, ხოლო მესამე პერიოდში თითქმის ამდენივე ჩააგდო - 31 ქულა. საქართველოს ნაკრები მესამე პერიოდის ბოლო მონაკვეთში გამოცოცხლდა და ქულების დაგროვება დაიწყო. მიუხედავად ამისა, ბოლო პერიოდის წინ მასპინძლები სამქულიანი უპირატესობით გავიდნენ.

დადგა გადამწყვეტი მონაკვეთის ჯერი, რომელიც ილიას ზუროსის გუნდმა ბრწყინვალედ ჩაატარა. ეს მეტწილად დაცვის ხაზზე ითქმის. ებრაელი მოთამაშეები ქულებს ადვილად ვეღარ აგროვებდნენ. შედეგად, მხოლოდ 12 ქულა მივიღეთ და საპასუხოდ, 20 ჩავაგდეთ. დასკვნით მეოთხედში ყველა კალათბურთელი გამორჩეული იყო, მაგრამ ცალკე უნდა აღინიშნოს გოგა ბითაძის დიდებული გარჯა. ნიჭიერმა ქართველმა ცენტრმა იმდენად ჩინებული შეხვედრა ჩაატარა, რომ გამოცდილი გიორგი შერმადინი ზუროსს გადამწყვეტ მონაკვეთში საერთოდ არ დაუტვირთავს და აღნიშნული სვლა სრულიად გამართლებული გამოდგა. გოგა დაცვაშიც ფანტასტიკურად ირჯებოდა და შეტევაშიც. სწორედ მეტოქის ფარზე მისმა მოხსნილმა ბურთმა და შემდეგ მოპოვებულმა ჯარიმამ განაპირობა საქართველოს ნაკრების დაწინაურება შეხვედრის ყველაზე მნიშვნელოვან მომენტში. ბოლოს იყო თონიკე შენგელიას ქულებიც და საბოლოოდ, საქართველომ მეტოქე 85:80 დაამარცხა.

ჩვენი გუნდის ლიდერი თორნიკე შენგელია გამორჩეული იყო და ორმაგ დუბლამდე ერთადერთი მოხსნა დააკლდა. „თოკომოტივმა“ 22 ქულა, 9 მოხსნა, 1 პასი და 1 ჩაჭრა გაახერხა. გოგა ბითაძესაც ერთი მოხსნა დააკლდა ორმაგ დუბლამდე, არასრულ 24 წუთში 13 ქულა, 9 მოხსნა, 2 პასი, 1 ჩაჭრა და 4 დაფარება (!) მიითვალა. ნიშანდობლივია, რომ გოგამ 7 მოხსნა შეტევაში დააგროვა!

კარგი დებიუტი ჰქონდა ჩვენი ნაკრების ახალ ლეგიონერ მატ ჯენინგს, რომელმაც 36 წუთში 15 ქულა (10-დან 5 სამქულიანი), 3 მოხსნა და 3 პასი მიითვალა. დიდებული იყო დუდა სანაძეც, რომელმაც ძალზე საჭირო მომენტებში, საჭირო ქულები დააგროვა - 17 ქულა, 3 მოხსნა, 1 პასი, 1 ჩაჭრა. დუდამ 7-დან 5 სამქულიანი ჩააგდო, რაც რასაკვირველია ფანტასტიკური შედეგია. უქულოდ დაასრულა მატჩი გიორგი ცინცაძემ, თუმცა „ბუმ“ პასები არიგა ბლომად - 7. ჩვენს ნაკრებს ქულები ასევე მოუტანეს გიორგი შერმადინმა (9 ქ), მერაბ ბოქოლიშვილმა (3 ქ) და მიხეილ ბერიშვილმაც (6 ქ).

საქართველოს ნაკრებმა 37-დან 16 სამქულიანი ჩააგდო (43.2%), 31-დან 13 ორქულიანი (41.9%) და 14-დან 11 საჯარიმო (78.6%). შეტევაში ბურთი 17-ჯერ მოხსნა, მაშინ, როდესაც მეტოქემ მხოლოდ 9-ჯერ მოახერხა იგივეს გაკეთება. საქართველოს ნაკრების გამარჯვება იყო დამსახურებული, რადგან აჯობა მეტოქეს და სატურნირო ცხრილში მეოთხე ადგილზე გადაინაცვლა. ილიას ზუროსის გუნდს თელ-ავივში თავი არ დაუზოგავს და გამარჯვებისთვის მაქსიმუმი გაიღო. ახლა, კიდევ უფრო დასანანად მოსჩანს წინა საკვალიფიკაციო ეტაპზე დაკარგული ქულები, რომელიც მეტწილად, შესუსტებული შემადგენლობით იყო განპირობებული. თუმცა, რა გაეწყობა. სხვათა შორის, ახლაც არ ყოფილა სრული შემადგენლობა, ბექა ბურჯანაძე და მანუჩარ მარკოიშვილი დიდი ძალაა ჩვენი გუნდისთვის...

ამრიგად, საქართველოს ნაკრებს 7 შეხვედრის შემდეგ 3 მოგების წილ 4 წაგება აქვს, სწორედ ისრაელის ნაკრებს გაუტოლდა და პირად შეხვედრებში უპირატესობის გამო მეოთხე ადგილზე თავად აინაცვლა. ილიას ზუროსის გუნდი მომდევნო, ძალიან მნიშვნელოვან მატჩს 16 სექტემბერს, თბილისში, ჯგუფის ფავორიტ საბერძნეთის ნაკრებთან ჩაატარებს.

ისრაელი - საქართველო 80:85 (23:26, 14:23, 31:16, 12:20)

Loading...

კომენტარები (12)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
12:39 | 14.09.2018
sandrinio10 (1402)

ბოისას არ ყოფნამ გვიშველა , ანატოლი ბოისა გვთარსავდა. თოკო უნდა იყოს ნაკრების ახალი კაპიტანი !!! და კიდე გვყავს ისეთი კალათბურთელები რომლებიც მარტო სკამზე ჯდომით არ შემოფარგლებიან, გოგა ჯანელიძე თოკოს შემცვლელად და ლუკა ბულაშვილი ცინცაძის შემცვლელად . რაღაც დროით რომ დაასვენონ.

12:27 | 14.09.2018
federerjamesliverpooldelpotro (9844)

მადლობა ბიჭებს.ისრაელში გამარჯვება მარტივი საქმე არაა და თამაშის ხარისხიც წინა მატჩებთან შედარებით მაღალი იყო.გამოჩნდა პროგრესი და ბითაძე.ზუროსის შესაძლებლობებში ეჭვი არასდროს მეპარებოდა.შანსი მცირეა საბერძნეთთანაც და ჯგუფიდან გასასვლელად მაგრამ გამარჯვება მაინც მნიშვნელოვანი და კარგია იმედია ასე გააგრძელებენ

10:53 | 14.09.2018
shakooo7 (2440)

კალათბურთი ჩვენი თამაშია! დიდი მადლობა ბიჭებს!

10:26 | 14.09.2018
Buratino (3170)

ქებათა ქება ბიჭებს და ილიას ზუროსს! დიდებული თამაში მოვიგეთ, რაც მნიშვნელოვნად შეჰმატებს თავდაჯერებას ჩვენს საკალათბურთო ნაკრებს. პირველი ტაიმის შემდეგ, როდესაც თამაშს ჩვენ ვაკონტროლებდით და თითქმის ყველამ ჩაყარა 3-იანები, არ მეგონა ისრაელი ასეთ თავბრუდამხვევ ტემპს თუ შემოგვთავაზებდა. მეოთხე მეოთხედში კი, როცა წინ ვერაფრით გავდიოდით, ერთი მომენტი ვიფიქრე რომ ამ თამაშს ვეღარ შემოვაბრუნებდით. თუმცა, ჩვენმა ბიჭებმა კიდევ ერთხელ დაამტკიცეს რომ საქართველოში კალათბურთი ცოცხალია და პერსპექტივაც გააჩნია! ჰოდა, ღამე ძალიან კარგ ხასიათზე დამეძინა

10:28 | 14.09.2018
Buratino (3170)

კვირას ყველას მოვუწოდებ სპორტის სასახლეში მოსვლისკენ. რეალურად, ბერძნებთან შანსი გაცილებით მცირეა (ვიდრე იყო ისრაელთან), თუმცა თუ აქაც ივაჟკაცეს ბიჭებმა, მაშინ მსოფლიოზე გასვლა ნამდვილად რეალური გახდება

21:51 | 14.09.2018
ogafa (7618)

+

10:24 | 14.09.2018
giogobi (144)

ყოჩაღ ბიჭებს! გასვლის რა ვთქვა, მაგრამ ძალიან რთული თამაში კი მოიგეს. ცინცაძემ მაგარი ბურთი ჩაჭრა და შენგელიამ კი შეასრულა, ეს იყო გადამწყვეტი. ბითაძე სულ სხვა კალათბურთელია დღეს უკვე, კლასი ეტყობა, ფიზიკაში მომატებული აქვს და საერთოდ კაი დაცვას თამაშობს. მაგარი თამაში იქნება საბერძნეთთან

03:17 | 14.09.2018
NudeDude (769)

ვერ ვუყურე პირდაპირ ეთერში და რა კარგია ეს გადახვევის ფუნქცია რომ არსებობს) ვისიამოვნე ბიჭების ბრძოლისუნარიანობით, ჟინით, ნიჭით... მადლობა ასევე მწვრთნელს, რომელმაც(საშინელი მესამე მეოთხედის შემდეგ) გუნდის გამოცოცხლება და დალაგება. ბიჭებს კიდევ ერთხელ დიდი მადლობა! გოგამ თუ ასე გააგრძელა მალე, ძალიან მალე ვიხილავთ NBA-ში! მთავარია შრომა გააგრძელოს. ყველანი კარგები იყვნენ პრინციპში. კეთილო ხალხო ბილეთები საბერძნეთთან მატჩისთვის თუ დარჩა ვინ იცის და სად ვიყიდი? იანისი მართლა მოდის?))

10:21 | 14.09.2018
Buratino (3170)

ბილეთები შეგიძლია ონლაინით იყიდო TKT.Ge-ზე მაგრამ კარგი ადგილები თითქმის აღარ დარჩა.
რაც შეეხება ანტეტოკუმპოს, იანისი არა მაგრამ მისი ძმა (რომელიც საბერძნეთში თამაშობს) კი მოდის. და საერთოდ, ბერძნებს პრაქტიკულად ყველა ევროლიგელი მოჰყავთ

01:47 | 14.09.2018
dubligi23 (598)

კიდევ 2 რომ წააგოს სერბეთმა, არაა საჭირო..კიდე ერთი...ნუ რათქმაუნდა ჩვენ, ჩვენები უნდა მოვიგოთ...საბერძნეთმა შეიძლება ზუროსის ხათრით და ისედაც...აღარ ჭირდება ნუ..

03:05 | 14.09.2018
iolasha75 (35)

კიდე ერთი რო წააგოს სერბეთმა, გაუხდება 4 წაგება, ჩვენ ყველა დარჩენილი რო მოვიგოთ, რაც ცოტა ფანტასტიკის სფეროს მიეკუთვნება, დაგვრჩება 4 წაგება და მაგ დროს მგონი ურთიერთშეხვედრები წყვიტავს, გინდაც ბურთების შეფარდება წყვიტავდეს, მაინც ვერ ვაჯობებთ. თან საბერძნეთთან 16-ში თამაშის მერე მინიმუმ შენგელია და ჯენინგი არ გვეყოლებიან და თუ მანუ და ბურჯანაძე არ დაგვიბრუნდნენ ძაან გაგვიჭირდება ყველა თამაშში...მაგრამ მიუხედავად ამისა დღეს ბიჭებში ისეთი შემართება ჩანდა , რომ ეტყობა იმედი კიდე აქვთ და სანამ შანსი იქნება ჩვენც უნდა გვქონდეს. ბითაძეს უდიდესი პროგრესი აქვს, თვიდან თვემდე უმატებს და დღესვე ჯობია შერმადინს. ჩემი აზრით მიუხედავად 20 წლამდე ევროპის ჩაგდებისა მამუკელაშვილის არ გამოძახება დანაშაულია, სულ რაღაც ერთი წლის წინ ბიჭი ევროპის ტოპ 3 ნიჭიერ კალათბურთელში შედიოდა 99-ანებში, დონჩიჩის და მუსას შემდეგ, მაშინ ბითაძე მე-8 ადგილზე იყო ამ სიაში და შეიძლება ახალგაზრდული ასაკის გამო რაღაც ჩავარდნა ქონდა, მაგრამ ვიცი რომ სერიოზულად უდგება საქმეს და პროფესიონალია,ამ 12 კაცში ნამდვილად იმსახურებდა ყოფნას , თუნდაც ლონდარიძის ან სხვა რომელიმე სკამზე მჯდომის მაგივრად!

00:38 | 14.09.2018
dinamo222 (4335)

37 სამქულიანი გვისროლიაა ! როდის მოასწრეს ? D

00:04 | 14.09.2018
sabonis (8506)

პირველ ევროპაზე მახსოვს უკრაინელებს არაფერში სჭირდებოდათ ბოლო თამაში, მარა იბრძოლეს ბულგარელებთან მოიგეს და ჩვენ გავედით და ქი "დაუბრუნეთ ხურდა" 2016-ში.დდ მოეგოთ ამათაც 2016-ში ბოლო თამაში უკრაინასთან და გავიდოდით ისევ და დაუბრუნებდით წელს ხურდად არ უნდოდათ რძე და ყველი.... იყვნენ ეხლა

00:02 | 14.09.2018
ალექსანდრე (5020)

საბერძეთმა მოუგო სერბეთს. რაც კარგია ჩვენთვის. კიდევ 2 მატჩი უნდა წააგოს სერბეთმა.

00:19 | 14.09.2018
iceman (1924)

მე გამორიცხული მგონია რომ სერბეთი მსოფლიოზე არ გავუშვათ სასწაული რომ მოხდეს და ყველა თამაში მოვიგოთ სერბები მაინც არ წააგებენ 2 თამაშსს მაქსიმუმ კიდევ 1 წააგონ ბერძნებთან

23:27 | 13.09.2018
BEERTRANCE (97749)

შანსი ისევ ფინთია, მარა საჭირო მოგება იყო.

23:26 | 13.09.2018
sabonis (8506)

მანუ გვყოლადა ვნახავდი რას იბლატავენბდა ეგ ბლატი.

სარეკლამო ადგილი - 9
250 x 250
სარეკლამო ადგილი - 20
250 x 188
სარეკლამო ადგილი - 22
250 x 250
0.185329