საქართველოს ძიუდოისტთა ახალგაზრდული ნაკრების წევრებმა ჯაბა პაპინაშვილმა (60 კგ) და ბაგრატ ნინიაშვილმა (66 კგ) ევროპის ახალგაზრდულ ჩემპიონატზე ბრინჯაოს მედლები მოიპოვეს. სოფიაში დღეს დაწყებულ ევროპირველობაზე ვაჟთა და გოგონათა შორის სულ მედლების სამ-სამი კომპლექტი გათამაშდა. საქართველოს ნაკრებს კი ხუთი ძიუდოისტი წარმოადგენდა.

ახალგაზრდებს შორის მსოფლიოს მოქმედი ჩემპიონი ჯაბა პაპინაშვილი ევროპირველობის ძირითად ბადეში მეოთხედფინალამდე მივიდა. კვიპროსის სახელით მოჭიდავე გეორგიოს ბალარჯიშვილისა და თურქი სამეთ კუმტაშის იპონ-იპონ ძლევის შემდეგ, აზერბაიჯანელ ტოფიგ მამადოვთან იპონითვე წააგო. რეპეშაჟის ნახევარფინალში რუსეთის ნაკრების წევრ ობიდ ძებისოვს ვაზარით აჯობა. "ბრინჯაოს ფინალში” კი ვაზარითვე გაუსწორდა ჰოლანდიელ ივო ვერჰორსტერტს.

ახალგაზრდებში მსოფლიოს შარშანდელი ჩემპიონატის ბრინჯაოს პრიზიორმა ბაგრატ ნინიაშვილმა ევროპის ჩემპიონის ტიტულის მოპოვების შანსი ნახევარფინალში დაკარგა, იტალიელ მანუელ ლომბარდოსთან "ოქროს დროში” გაშვებული გდებით. იქამდე 19 წლის ქართველმა ჩერნოგორიელი მარკო გუსიჩი და ფრანგი რედა სედუკი ჩამოიშორა. რეპეშაჟის ფინალში კი ებრაელი ამიტ ბობოვიჩი წუთნახევარში გააკრა ტატამს.

საქართველოს ახალგაზრდული ნაკრების სამი წევრი მედლებისთვის ბრძოლას საწყისი ეტაპიდან გამოეთიშა.

ჭაბუკებს შორის მსოფლიოს ბრინჯაოს პრიზიორი (2015) ვანო ხუბაშვილი (55 კგ) პირველსავე მეტოქესთან – თურქ ოგუჟან ოზისიკთან დამარცხდა. ჭაბუკებს შორის ევროპის ვერცხლის პრიზიორმა (2014) თემურ ნოზაძემ (60 კგ) კვიპროსელი ლუკა ლუკასი ჩამოიშორა და რუსეთის ნაკრების წევრ კონსტანტინ სიმეონიდისთან ვეღარას გახდა. ნატალია ყიფშიძემ (48 კგ) კი ევროპის ჩემპიონატი ავსტრიელ ჟაკლინ შპრინგერთან დაჭიდებით დაიწყო და დაასრულა.

ხვალ ჩემპიონ-პრიზიორები ვაჟთა შორის 73 და 81 კილოგრამ წონით კატეგორიებში გამოვლინდებიან, ხოლო გოგონებში – 63 და 70 კილოგრამებში. საქართველოს სახელით იჭიდავებენ: ტატო გრიგალაშვილი, ლუკა მაისურაძე (ორივე 81 კგ), მზია ბებოშვილი და ეთერ ლიპარტელიანი (ორივე 57 კგ).