ქართველმა სუმოისტმა ლევან გორგაძემ იგივე ტოჩინოშინმა სექტემბრის სუპერტურნირზე მე-2 მარცხი განიცადა. ჩვენებურმა ძალები აღმოსავლეთის სეკივაკე მიტაკეუმისთან მოსინჯა და ივლისის ბაშოს ტრიუმფატორთან იორიკირით დამარცხდა.
დღევანდელ ორთაბრძოლამდე, ტოჩინოშინი იაპონელს ურთიერთშეხვედრებში 5:2-ს უგებდა, თუმცა, შერკინების აშკარა ფავორიტი ნამდვილად არ გახლდათ. ვინც აკი ბაშოს თვალს ყურადღებით ადევნებს, უდავოდ შეამჩნევდა, რომ ქართველ გოლიათს ტრავმა გასაქანს არ აძლევს და მას სრული დატვირთვით გარჯა უჭირს.
ამჯერადაც ასე იყო. ლევანი მიტაკეუმის სასტარტო მიძალებას სათანადოდ ვერ დაუდგა, დოჰიოს კიდესთან აღმოჩნდა და საპასუხო ილეთის განხორხიელება ვერ მოასწრო.
აღნიშნულის გათვალისწინებით, ცხადი ხდება, რომ ტოკიოში მიმდინარე სუპერტურნირზე ჩვენებურს “იმპერატორის თასისთვის” ბრძოლა ძალიან გაუჭირდება და უმთავრესი მიზანი დადებითი ბალანსის დაფიქსირება უნდა იყოს.
შეგახსენებთ, რომ გორგაძე კადობანში გახლავთ ჩაყენებული და ოძეკის მაღალი წოდების შენარჩუნებისთვის მინიმალური კაჩი-კოში მაინც უნდა დააფიქსიროს, ეს კი, იმის გათვალისწინებით, რომ ფავორიტებთან ბრძოლები ჯერაც წინაა, იოლი ამოცანა სულად არ იქნება.
ქართველ სეკიტორს მონაგარის გაზრდის კარგი შანსი ხვალ ექნება, როდესაც ძალებს აღმოსავლეთის პირველ მაეგაშირა იკიოისთან მოსინჯავს. საქმე ის გახლავთ, რომ ოსაკელ სუმოისტს აკი ბაშოზე ხუთივე შერკინება წაგებული აქვს და კარგ ფორმაში ნამდვილად ვერ უნდა იყოს, ამასთან, ჩვენებური მას ურთიერთშეხვედრებში 9:4-ს უგებს.
საშემოდგომოს სუპერტურნირის 5 დღის თავზე შეჯიბრს 7 დაუმარცხებელი მონაწილე ლიდერობს, რომელთა შორის, ხსენებული მიტაკეუმის გარდა, იოკოძუნებს – ჰაკუჰოს, კისენოსატოსა და კაკურიუს და ოძეკი ტაკაიასუს ვხედავთ.
რანგით მე-2 დივიზიონ ჯურიოში ძალიან უჭირს გაგამარუს შიკონათი ცნობილ თეიმურაზ ჯუღელს. ქართველი გოლიათი აკი ბაშოზე აღმოსავლეთის მე-12 ნომრის წოდებით ირჯება და დივიზიონში ადგილის შენარჩუნებისთვის დადებითი ბალანსი სჭირდება, თუმცა, ჯერჯერობით, მიზნიდან ძალიან შორსაა.
გაგამარუს აქტივში ერთადერთი გამარჯვებაა იმის ფონზე, რომ დღეს უკვე მეოთხედ წაიფორხილა. ქართველი გოლიათი ამჯერად აღმოსავლეთის მე-13 ნომერ აძუმარიუს გაეჯიბრა და შიტატენაგეთი დამარცხდა, ხვალ კი, დასავლეთის მე-10 რეიტინგოსან მიტორიუს გაეჯიბრება, რომელთანაც თანაბარი ბალანსი (1-1) აქვს.
