ქართველმა სუმოისტმა ლევან გორგაძემ იგივე ტოჩინოშინმა სექტემბრის სუპერტურნირზე პირველი მარცხი განიცადა.
დასავლეთის ოძეკის წოდების მქონე ქართველმა სეკიტორმა აკი ბაშოს მე-3 დღეს მისთვის უხერხულ მეტოქედ ქცეულ ტაკაკეიშოსთან წაიფორხილა. VIDEO
შეგახსენებთ, რომ ქართველ ფალავანს იაპონელ კომუსუბისთან გასული 4 ორთაბრძოლიდან 3 ჰქონდა წაგებული და ამჯერადაც, ვერ იმარჯვა.
ლევანმა მასზე გაცილებით დაბალ მეტოქეს (175 სმ.) თავიდანვე შეუტია, თუმცა, ტაკაკეიშოს მავაშის ხელში მოგდების მცდელობისას ზედმეტად გადაიხარა. ამით, მასპინძელმა კარგად ისარგებლა, გორგოძეს წინ დაქაჩა და ჰიკიოტოშით მოიგო.
ამგვარად, ტოჩინოშინი, რომელიც კადობანშია ჩაყენებული და ოძეკის ტიტულის შენარჩუნებისთვის დადებითი ბალანსის (კაჩი-კოში) დაფიქსირება მართებს, ლიდერთა ჯგუფს ჩამორჩა.
ამ დროისთვის, მაქსიმალური შედეგი ათ სუმოისტს გააჩნია, რომელთა შორის იოკოძუნები კისენოსატო, კაკურიუ და ჰაკუჰო, ოძეკი ტაკაიასუ და სეკივაკე მიტაკეუმიც არიან.

ხვალ, ტოჩინოშინის მეტოქე მონღოლი ტამავაში იქნება, რომელიც აკი ბაშოზე აღმოსავლეთის კომუსუბის რანგში ირჯება. აზიელს ტოკიოში სამივე ორთაბრძოლა წაგებული აქვს, ჩვენებური კი ურთიერთშეხვედრებში მას 15:8-ს უგებს.
სამწუხაროდ, ისევ უარყოფით ბალანსზე (1 მოგება, 2 მარცხი) გავიდა გაგამარუს შიკონათი ცნობილი თეიმურაზ ჯუღელი, რომელიც რანგით მე-2 დივიზიონ ჯურიოში ადგილის შენარჩუნებისთვის იბრძვის.
აღმოსავლეთის მე-12 განთესვის მქონე ქართველმა გოლიათმა, დღეს, ძალები დასავლეთის მე-11 ნომერ ჩიიონოუმისთან მოსინჯა და ცუკიოტოშით დამარცხდა.
საშემოდგომო სუპერტურნირის მე-4 დღეს გაგამარუს მეტოქე დასავლეთის მე-13 განთესვის მქონე ენჰო იქნება. ქართველი სეკიტორი იაპონელს კარიერაში პირველად გაეჯიბრება.