ამერიკის ღია პირველობაზე მამაკაცთა და ქალთა შორის ნახევარფინალები დაკომპლექტდა. მორიგი სენსაცია არ შედგა. ჯონ მილმანმა როჯერ ფედერერის ძლევის შემდეგ კიდევ ერთი სასწაული ვერ მოახდინა და ნოვაკ ჯოკოვიჩთან უბრძოლველად წააგო.
კლასში და გამოცდილებაში სხვაობა დიდი იყო და სერბმა ერთი ამოსუნთქვით მოიგო. ეჭვგარეშეა, “მხიარული როჯერისა” და ნოლეს შეხვედრა ბევრად დაამშვენებდა არტურ ეშის კორტებს, მაგრამ რა გაეწყობა. მილმანს კი ჯოკოვიჩი 2 საათსა 52 წუთში, მშრალად გაუსწორდა – 6:3, 6:4, 6:4.
ნოვაკ ჯოკოვიჩი ნახევარფინალში კეი ნიშიკორის დაუპირისპირდება. აი, იაპონელისა და მარინ ჩილიჩის მატჩი მართლაც გამოვიდა ლამაზი, დაძაბული და დრამატული. თუმცა, უფრო მეტად მონდომებული და უკეთესი აზიელი იყო და ფავორიტად შერაცხული ხორვატი დაამარცხა. შეხვედრა 4 საათზე მეტხანს გაგრძელდა და 5 სეტში დასრულდა. თავიდან, ჩილიჩმა დამაჯერებლად დაიწყო და პირველი სეტი ადვილად მოიგო. თუმცა, შემდეგ კეიმ ხელთიგდო სადავეები და, ჯერ 6:4, ხოლო მერე ტიაბრეიკზე 7:6 იმარჯვა და დაწინაურდა. მარინი გამოფხიზლდა და ანგარიშის გათანაბრებაც შეძლო. თუმცა, გადაწმყვეტი სეტი ისევ ნიშიკორის უპირატესობით წარიმართა და აზიელმა ნახევარფინალს უწია. ეს დიდებული შედეგია.
ჩილიჩი – ნიშიკორი 2:3 (6:2, 4:6, 6:7, 6:4, 4:6) VIDEO
ჯოკოვიჩი – მილმანი 3:0 (6:3, 6:4, 6:4) VIDEO
1/2 ფინალი
რაფაელ ნადალი – ხუან მარტინ დელ პოტრო
კეი ნიშიკორი – ნოვაკ ჯოკოვიჩი
ბოლო ნახევარფინალისტები ქალთა შორისაც გამოვლინდნენ. დღემ სენსაციების გარეშე ჩაიარა და ფავორიტებმა მოიგეს. მედისონ კიზიმ ესპანელ კლარა სუარეს ნავაროს საათნახევარში მოუმთავრა საქმე და ორ სეტში დიდი წინააღმდეგობის გარეშე იმარჯვა.
ასევე ორ სეტში, ზუსტად ერთ საათში და კიდევ უფრო ადვილად მიაღწია წარმატებას ნაომი ოსაკამ, რომელმაც ლესია ცურენკოს ოდენ ორი გეიმი დაუთმო და მეტოქე გაანადგურა – 6:1, 6:1. საინტერესოა, რომ დიდი მუზარადის ტურნირის ნახევარფინალში (ქალთა შორის) იაპონელ ჩოგბურთელს 1996 წლის შემდეგ პირველად ვიხილავთ. საერთოდაც, ორივე კატეგორიაში იაპონია ორი მოთამაშითაა წარმოდგენელი (ოსაკა და ნიშიკორი).
ოსაკა – ცურენკო 2:0 (6:1, 6:1) VIDEO
სუარეს ნავარო – კიზი 0:2 (4:6, 3:6) VIDEO
1/2 ფინალი
სერენა უილიამსი – ანასტასია სევასტოვა
მედისონ კიზი – ნაომი ოსაკა
