პრემიერლიგას სამი ტურის შემდეგ, სამი უდანაკარგო გუნდი ჰყავს, ხოლო "ტოტენჰემს" სათამაშო აქვს. გუშინ “ლივერპულმა” იზეიმა მესამე გამარჯვება, ხოლო დღეს მერსისაიდელებს “უოტფორდმა” და “ჩელსიმ” მიბაძეს.

დღის გახსნით მატჩში “უოტფორდი” საკუთარ მოედანზე “კრისტალ პალასს” დაუხვდა და 3 ქულა მოიპოვა. პირველი ტაიმი გატანილი გოლების გარეშე დასრულდა, ხოლო მეორე ნახევრის დაწყებიდან მალევე რიკარდო პერეირამ ინდივიდუალური ოსტატობის ხარჯზე ანგარიში გახსნა. 71-ე წუთზე ჰოლებასმა ლამაზი დარტყმით სხვაობა გაზარდა, ხოლო მატჩის ბოლოს ვილფრიდ ზაჰამ იყოჩაღა და მახვილი კუთხიდან სხვაობა შეამცირა – 2:1.

“ჩელსიმ” გასვლაზე “ნიუკასლის” დამარცხება მოახერხა. მატჩის მთავარი მოვლენები უკანასკნელ 15 წუთში განვითარდა: 76-ე წუთზე ედენ აზარმა პენალტი ზუსტად შეასრულა და სტუმრები დააწინაურა, თუმცა შვიდ წუთში ხოსელუმ თავური დარტყმით წონასწორობა აღადგინა. “არისტოკრატებმა” გამარჯვება მაინც შეძლეს, ვილიანმა საჯარიმოდან ჩააწოდა, რასაც მარკოს ალონსოს დარტყმა და დეანდრე იედლინისგან ასხლეტილი ბურთი მოჰყვა, რომელიც “კაჭკაჭების” კარში აღმოჩნდა – 1:2.

ამრიგად, სამი ტურის შემდეგ, 9 ქულა “ლივერპულს”, “ჩელსის” და “უოტფორდს” აქვთ.

დღის მესამე მატჩში “ფულჰემმა” “ბარნლის” უმასპინძლა და უხვგოლიან მატჩში აჯობა. ლონდონელებმა ტაიმი 3:2 იმარჯვეს, ხოლო მეორე ნახევარში მათი უპირატესობა ანდრე შურლემ გაზარდა – 4:2.

ფულჰემი – ბარნლი 4:2 (3:2)

გოლები: 1:0 სერი (4), 1:1 ჰენდრიკი (10) 2:1, 3:1 მიტროვიჩი (36; 38), 3:2 ტარკოვსკი (41), 4:2 შურლე (83)

უოტფორდი – Kრისტალ პალასი 2:1 (0:0)

გოლები: 1:0 პერეირა (53), 2:0 ჰოლებასი (71), 2:1 ზაჰა (78)

ნიუკასლი – ჩელსი 1:2 (0:0)

გოლები: 0:1 აზარი (76 პენ.), 1:1 ხოსელუ (83), 1:2 იედლინი (87 პენ.)