ქუთაისის “ტორპედოს” მთავარმა მწვრთნელმა კახა ჩხეტიანმა ბულგარულ “ლუდოგორეცთან” მატჩამდე პრესკონფერენცია გამართა და ხვალინდელი შეხვედრის შესახებ ვრცალდ ისაუბრა.

ქართველი სპეციალისტის განცხადებით, მისი გუნდი მზადაა მნიშვნელოვანი თამაშისთვის და ყველა ფეხბურთელს კარგად აქვს გაცნობიერებული, თუ რამდენად ახლოს არიან ევროპა იგის ჯგუფურ ეტაპთან.

“რაც უნდა ვისაუბროთ, ეს თამაში განსხვავდება სხვა მატჩებისგან თავისი მნიშვნელობით. როგორც ჩვენი გუნდისთვის, ისე მთლიანად ქვეყნისთვის. განსაკუთრებულად ვემზადებით და ყველა ფეხბურთელი მზადყოფნაშია და 100%-ით მზად ვართ, რომ სიხარული მოვუტანოთ საქართველოს.

რა თქმა უნდა, ფსიქოლოგიური მხარე ძალიან მნიშვნელოვანია, მაგრამ წინასწარ არანაირი მომზადება არ სჭირდებათ ამ კუთხით ბიჭებს. მათ კარგად იციან, რომ შესწევთ ძალა ასეთ კლუბებთან თამაშის და ბარიერის დაძლევის. ორი თამაშია და უნდა ვეცადოთ, რომ ჯამში ერთით მეტი ბურთი გავიტანოთ. დარწმუნებული ვარ, ბიჭები ყველაფერს გაიღებენ გამარჯვებისთვის.

მთავარია, რომ დღეს ჩვენ ვართ აქ და პლეი-ოფში ჩვენ ვთამაშობთ. ალბანელებს ავუხსენით, რომ ჩვენ არაფერ შუაში არ ვიყავით და ვფიქრობ, თავადაც მიხვდნენ ამ ყველაფერს.

დაცვიდან თამაშს არასდროს არ ვცდილობთ. უბრალოდ, ის არის, რომ ახალი შეკრებილები ვიყავით და პირდაპირ თამაშები დავიწყეთ. დრო არ გვქონდა და პრაქტიკულად ოფიციალურ თამაშებში უწევს გუნდს შეთამაშება. ამას ემატება მგზავრობა და ესეც მოქმედებს. მადლობა ღმერთს მომდევნო ეტაპზე ჩვენ გავედით. ძალიან მინდა, რომ მიზანს, რომელიც დასახული გვაქვს, მივაღწიოთ. ორი თამაში დარჩა და უკვე ჯგუფში ვხვდებით. რა თქმა უნდა, შეტევაშიც აქტიურები უნდა ვიყოთ და თავიც დავიცვათ კარგად. რაც მთავარია, ეს უნდა მოხდეს სწრაფად და ორგანიზებულად.

“კუკეშთან” მატჩის ხარისხით კმაყოფილები რა თქმა უნდა არ ვართ, მაგრამ წეღანაც ვახსენე, რომ გუნდი შეუთამაშებელი იყო და პირდაპირ თამაშებიდან მოგვიწია ფორმაში შესვლა. რაც მოხერხდა ამ თამაშამდე, ვეცდებით, რომ ხვალინდელ შეხვედრაში ვაჩვენოთ.

ეროვნული ლიგის გადადებულ მატჩებს რაც შეეხება, ვერ მოვახერხებდით აღდგენას და გაცილებით უარესი იქნებოდა. მინდა, ფეხბურთის ფედერაციას და კლუბებს მადლობა გადავუხადო, რომ ეს ყველაფერი გაიგეს.

რა თქმა უნდა, “ლუდოგორეცის” ფინანსური კუთხით ვერ გავეჯიბრებით. ვიტყვი, რომ კომბინაციურ ფეხბურთს თამაშობენ, თუმცა, ბოლო მატჩები ვნახე და დამაგვირგვინებელ ფაზაში მაინც და მაინც, კარგად ვერ მოქმედებენ. რას დავუპირისპირებთ? – ამას ხვალინდელი თამაში გვიჩვენებს.

აქამდე მოვედით და უკვე მზად უნდა ვიყოთ. შემთხვევით რომ ჩაგვსვას ვინმე ჯგუფში, მერე რა უნდა ვქნათ? (იღიმის). ამიტომ, ჩემი გუნდი მზადაა. ქართული ფეხბურთის ნელ-ნელა წინ მიდის, რადგან თითქმის ყველა გუნდი გასულ წლებთან შედარებით უკეთ გამოვიდა ევროსარბიელზე. ღმერთმა ქნას, რომ ჯგუფში მოვხვდეთ და იქ ფეხბურთელები კარგად გააცნობიერებენ ამ წარმატებას.

ქუთაისში თამაში ჩვენთვის ნიშნავს ყველაფერს, რადგან ყველამ ვიცით იქაური გულშემატკივრის ამბავი. დარწმუნებული ვარ, რომ იქ სტადიონი ბოლომდე გაივსებოდა. ძალიან უყვართ ჩვენს ქალაქში ფეხბურთი. რომ იტყვიან, ფეხბურთის გიჟები არიან და მართლა გულით უდგანან გუნდს გვერდში. ზუსტად ვიცი, მათთვის რას ნიშნავს ქუთაისის “ტორპედო” და რამხელა სიხარული მოჰყვებოდა იქ რომ გვეთამაშა. იმედი მაქვს, რომ სამომავლოდ გამოსწორდება სიტუაცია და ალბათ, ჩვენს მერიასაც გული შეტკივა ამ ყველაფერზე და სტადიონი გაკეთდება. დარწმუნებული ვარ, რომ ყველა ქუთაისელი, რომელსაც გუნდი უყვარს, ხვალ თბილისში იქნება. ჩვენთვის ძალიან მნიშვნელოვანია გულშემატკივარი, რადგან მაყურებლის გარეშე ფეხბურთის თამაშს აზრი არ აქვს. იმედია, ხვალ სტადიონზე ბევრი გულშემატკივარი იქნება”, - განაცხადა ჩხეტიანმა.

ხვალინდელი შეხედრის შესახებ მცირე კომენტარი “ტორპედოს” კაპიტანმა როინ კვასხვაძემაც გააკეთა:

“ვემზადებით ბრძოლისთვის. ყველაფერს გავაკეთებთ იმისთვის, რომ გავახაროთ ჩვენი ქალაქი, ჩვენი გულშემატკივარი და დარწმუნებული იყავით, რომ მაქსიმუმს გავიღებთ წარმატებისთვის”, - თქვა კვასხვაძემ.

შეგახსენებთ, “ტორპედოსა” და “ლუდოგორეცის” შეხვედრა 23 აგვისტოს, თბილისში, “მიხეილ მესხზე”, 20:00 საათზე გაიმართება.