იტალიის ჩემპიონი ტურინის “იუვენტუსი” ჯანლუიჯი ბუფონის შემდეგ კიდევ ერთმა თილისმამ და სიმბოლომ დატოვა. როგორც “ბებერი ქალბატონის” ვებგვერდი იტყობინება, კლაუდიო მარკიზიო გუნდში აღარ ირიცხება.

მხარეებს შორის ურთიერთშეთანხმების საფუძველზე ხელშეკრულება ვადაზე ორი წლით ადრე გაწყდა და შესაბამისად, 32 წლის ნახევარმცველი თავისუფალი აგენტია.

“დაუვიწყარი შავ-თეთრი 25 წელი კლაუდიო მარკიზიოსთვის დასრულებულია. მადლობა ყველაფრისთვის! შენ მუდამ შავ-თეთრად დარჩები!”, - წერს ტურინული გრანდის საიტი.

“ათასი ფიქრი და სურათი მთელი ღამის განმავლობაში. ვერაფერი შეაჩერებს ამ სურათს და ზოლს, რომელიც დაიწერა ამ დროის განმავლობაში, როგორც კაცის, ისე ფეხბურთელის რანგში. მიყვარს ეს მაისური მიუხედავად ყველაფრისა და დარწმუნებული ვარ გუნდი ყოველთვის პირველ ადგილზე დგას. ეს ურთულესი დღეა ჩემთვის. ჩვენ ისევ შევხვდებით ერთმანეთს და განსაკუთრებულად მივესალმებით ერთმანეთს”, - დაწერა სოციალურ ქსელში მარკიზიომ.

კლაუდიო მარკიზიო “იუვენტუსის” აკადემიის აღზრდილია. პირველად ის ამ გუნდში 1993 წელს გამოჩნდა და 2006 წელს უკვე მთავარ გუნდში ჰქონდა დებიუტი. ერთადერთი გამონაკლისი, როდესაც მარკიზიო “იუვეს” მაისურით არ თამაშობდა, 2007-2008 წლების სეზონი იყო, როცა იჯარით “ემპოლიში” ირიცხებოდა.

მთლიანობაში მარკიზიომ “ბიანკონერის” რიგებში 389 შეხვედრა ჩაატარა და 37 გოლი გაიტანა. 7-ჯერ მოიგო სკუდეტო, 4-ჯერ იტალიის თასი, სამჯერ იტალიის სუპერთასი, ხოლო ორჯერ ჩემპიონთა ლიგის ფინალში ითამაშა.

კლაუდიო მარკიზიო “იუვენტუსში” “პრინცის” მეტსახელით სარგებლობდა, თუმცა ტურინში “პრინცი” სათანადადოდ ვერ დააფასეს. ჯერჯერობით უცნობია თუ სად გააგრძელებს კარიერას იტალიელი ფეხბურთელი.