ტურინის “იუვენტუსის” თავდამსხმელმა მარიო მანჯუკიჩმა ხორვატიის ნაკრები დატოვა. ამის შესახებ ოფიციალური განცხადება თავად ხორვატმა ფეხბურთელმა გაავრცელა.

“ჩემთვის საამაყო იყო ამ მაისურის ტარება, მაგრამ ახლა შესაფერისი მომენტია, რომ ხორვატიის ნაკრები დავტოვო. მსოფლიოს ჩემპიონატზე მოპოვებული ვერცხლის მედლის შემდეგ, ამაზე უკეთეს მომენტს წასვლისთვის ვერ ვნახავდი. ამიერიდან, მეც ხორვატიის ნაკრების რიგითი გულშემატკივარი ვარ”, - განაცხადა მანჯუკიჩმა.

მარიო მანჯუკიჩს ხორვატიის ეროვნულ ნაკრებში დებიუტი 2007 წელს ჰქონდა. მას შემდეგ 32 წლის ფორვარდმა 89 შეხვედრაში 33 გოლი გაიტანა, 9 საგოლე პასი გააკეთა და ერთი თვის წინ მსოფლიოს ჩემპიონატის ვერცხლის მედალი მოიგო.