საჩხერის “ჩიხურამ” ეროვნული ლიგის მესამე წრე წარმატებით დაიწყო და აუტსაიდერი “კოლხეთი 1913” დამაჯერებლად დაამარცხა. სხვათა შორის, ერთთვიანი პაუზის დროს “კოლხეთში” ბევრი ცვლილება მოხდა, მთავარი კი ახალი მთავარი მწვრთნელია. იტალიელ რობერტო ლანდის მაინც და მაინც კარგი სტარტი ვერ გამოუვიდა.

არადა, შეხვედრა სტუმართათვის დამაიმედებლად დაიწყო და უკვე მე-17 წუთზე მიხაილიოვის გოლით ფოთელები დაწინაურდნენ. აი, მერე კი სოსო ფრუიძის გუნდი, რომელმაც სლოვენიურ “მარიბორთან” ბოლომდე იბრძოლა, უპირატესობა ხელთიგდო და სამი ქულა დამსახურებულად მოიპოვა.

იმერლები პირველივე ტაიმში უკვე წინ იყვნენ. ირაკლი ბუღრიძისა და გიორგი გაბედავას გოლებით. საკონტროლო გასროლა და კი შეხვედრის მიწურულს ბუხაიძის გოლი იყო – 3:1.

“ჩიხურას” 34 ქულა გაუხდა და მესამე ადგილს ამაგრებს, ხოლო “კოლხეთის” ვითარება მეტად მძიმეა: 8 ქულა და ბოლო პოზიცია. აქვე გეტყვით, რომ ეროვნული ლიგის მე-19 ტურის კიდევ ერთი მატჩი “ტორპედოსა” და “დილას” შორის გადაიდო. ამის მიზეზი ქუთათურთა შეხვედრაა ევროპა ლიგის მესამე საკვალიფიკაციო ეტაპზე.

“ჩიხურა” – “კოლხეთი” 3:1 (2:1)

გოლები: 0:1 მიხაილიოვი (17), 1:1 ბუღრიძე (20), 2:1 გაბედავა (43), 3:1 ბუხაიძე (86)