ჭადრაკი

17:02 | 31.07.2018 | ნანახია 538 - ჯერ

ბათუმი 2018: „ერთი დღე ჭადრაკის სამყაროში“

43-ე მსოფლიო საჭადრაკო ოლიმპიადის საორგანიზაციო კომიტეტის და საქართველოს ჭადრაკის ფედერაციის ერთობლივ ღონისძიებას „ერთი დღე ჭადრაკის სამყაროში“ ღვინის ქარხანამ უმასპინძლა.

დღის კულმინაციად უპრეცედენტო საჭადრაკო დაპირისპირება იქცა მსოფლიოს ხუთგზის ჩემპიონ ნონა გაფრინდაშვილსა და ევროპის საჭადრაკო კავშირის პრეზიდენტ ზურაბ აზმაიფარაშვილს შორის: „მეტოქეებმა“ ღვინით სავსე ჭიქებით ითამაშეს, რომლებსაც საჭადრაკო ფიგურების აღმნიშვნელი სტიკერი ჰქონდა დაკრული, ყოველი „მოკლული ფიგურის“ შემდეგ კი ნონა გაფრინდაშვილი და ზურაბ აზმაიფარაშვილი სპეციალურ სადღეგრძელოს ამბობდნენ. ამ ღონისძიების სპონსორი „მეღვინეობა ხარება“ გახლდათ.
ბათუმი 2018-ის კეთილი ნების ელჩს ნონა გაფრინდაშვილს და ოლიმპიადის საორგანიზაციო კომიტეტის დირექტორს ზურაბ აზმაიფარაშვილს საჭადრაკო პაექრობაში სტუმრები, საქართველოს განათლების, მეცნიერების, კულტურისა და სპორტის მინისტრის მოადგილე შალვა გოგოლაძე, საქართველოს ეროვნული ოლიმპიური კომიტეტის გენერალური მდივანი ემზარ ზენაიშვილი, საქართველოს ჭადრაკის ფედერაციის პრეზიდენტი გიორგი გიორგაძე და სხვები ეხმარებოდნენ. უჩვეულო პაექრობა ყაიმით დასრულდა.

„სულ ცოტა დრო რჩება საჭადრაკო ოლიმპიადის დაწყებამდე და ჩვენ, საორგანიზაციო კომიტეტის წევრები ვცდილობთ სხვადასხვა ღონისძიებით და აქტივობით საქართველოს თითოეულ მოქალაქეს შევატყობინოთ ამ მნიშვნელოვანი და უდიდესი სპორტული შეჯიბრების შესახებ. მიხარია, რომ ამდენი სტუმარი გვყავს. დარწმუნებული ვარ, დღეს ყველა თქვენგანი კმაყოფილი დარჩება“! - განაცხადა საქართველოს ჭადრაკის ფედერაციის პრეზიდენტმა გიორგი გიორგაძემ.
მანვე სპეციალური პრიზი გადასცა ეროვნული ნაკრები გუნდების სამოსის კონკურსში გამარჯვებულ მარიამ ლორთქიფანიძეს, რომლის ესკიზებმა საყოველთაო მოწონება დაიმსახურა. სტუმრებს სამოსის ესკიზების დათვალიერებაც შეეძლოთ.

დღესვე გაიმართა მოყვარულ მოჭადრაკეთა ტურნირი, რომელშიც მწერლები და სპორტული ჟურნალისტები მონაწილეობდნენ. ჩემპიონის ტიტული, თასი და მთავარი პრიზი ზაქრო ინწკირველმა მოიპოვა. ის მაისში, ქობულეთში გამართულ მედია-ტურნირზე მეორე იყო. ვერცხლის მედლით დაჯილდოვდა ლიტერატურული პრემია „საბას“ ორგზის ლაურეატი, მწერალი ლევან ბრეგაძე, მესამე ადგილი და ბრინჯაოს მედალი კი ფილოლოგს, თბილისის 24-ე საშუალო სკოლის დირექტორს გია მურღულიას ერგო.

„დღევანდელმა გამარჯვებამ ძალიან გამახარა. ოლიმპიადის საორგანიზაციო კომიტეტი მოყვარულ მოჭადრაკეებს მუდმივად საინტერესო ღონისძიებებს გვთავაზობს და ეს ძალიან დასაფასებელია. ვიმედოვნებ, საქართველოს ეროვნული ნაკრები გუნდების წევრები ოლიმპიადაზე კარგად იასპარეზებენ და ჩვენ, ასევე ყველა მათ ქომაგს გაახარებენ“, - განაცხადა ზაქრო ინწკირველმა.

43-ე მსოფლიო საჭადრაკო ოლიმპიადის საორგანიზაციო კომიტეტი ასევე განაგრძობს „ნონას თასის“ საქართველოს ქალაქებში გამოფენას. 4, 5 და 6 აგვისტოს საჭადრაკო ოლიმპიადის ერთ-ერთი ყველაზე პრესტიჟული პრიზი იმერეთსა და რაჭაში: ქუთაისში, საჩხერესა და ამბროლაურში გამოიფინება.

ბათუმი 43-ე მსოფლიო საჭადრაკო ოლიმპიადას 23 სექტემბრიდან 5 ოქტომბრის ჩათვლით უმასპინძლებს. ბათუმმა ეს უფლება 2014 წელს, ნორვეგიის ქალაქ ტრომსოში გამართულ ფიდე-ს გენერალურ ასამბლეაზე მოიპოვა, სადაც 93 ხმა მიიღო, კონკურენტმა დურბანმა (სამხრეთ აფრიკა) კი - 58.

2018 წლის მსოფლიო საჭადრაკო ოლიმპიადის საორგანიზაციო კომიტეტი

Loading...

კომენტარები (4)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
16:40 | 05.08.2018
choloka (790)

მელია-არაბიძის მატჩზე დაგეწერათ

11:15 | 02.08.2018
პანტელეიმონი (4100)

+1

10:45 | 02.08.2018
O. Mertskhali (3219)

17:23 | 31.07.2018
#გავკარიჩემსპრეზიდენტს (KORBEN) (13528)

ამათმა თუ ყველა მოკლული "ფიგურა" დალიეს, ყაიმზე ალბათ სულ სლოკინ-სლოკინით შეთანხმდნენ

21:04 | 31.07.2018
jikha (795)

სარეკლამო ადგილი - 20
250 x 188
სარეკლამო ადგილი - 22
250 x 250
0.083126