ხორვატიის ნაკრებმა მოლოდინისამებრ დაიწყო – დამაჯერებლად, გუნდურად და ლამაზად. ზლატკო დალიჩის გუნდმა კალინინიგრადში, ხორვატიამ ნიგერიის ნაკრების დასამარცხებლად ზუსტად იმდენი ენერგია დახარჯა, რამდენიც სჭირდებოდა.

საერთოდ, დიდი მოლოდინია ბალკანელებისგან და ეს ბუნებრივიცაა, რადგან ჩინებული ფეხბურთელებითაა დაკომპლექტებული, თანაც ყველა რგოლში. შესაბამისად, სპეციალისტები მისგან ბევრს ელიან და საწყისი გამოცდა ჩაბარებულია. არადა, ნიგერიის სახით კერკეტი კაკალი უწევდა კონკურენციას და კარგა ხანს არც ჩამორჩენილა არაფერში.

გერნოტ რორის გუნდი ფიზიკურად კარგად იყო მომზადებული და მეტოქეს ტოლს არ უდებდა. ერთი ეგაა, შეტევაში ფანტაზია აფრიკელებს აშკარად აკლდათ. თავის მხრივ, თავდასხმაში დიდად არც ხორვატია გამორჩეულა, მაგრამ ტაიმის შუაწელს მაინც დაწინაურდა. გოლის სტანდარტს და მარიო მანჯუკიჩის აქტიურობას მოყვა – ნიგერიელმა ეტებომ ავტოგოლი მიითვალა. არადა, “სტოკ სიტის” ფეხბურთელი თანაგუნდელებს შორის ერთ-ერთი გამორჩეული იყო მინდორზე. რას იზამს, არ გაუმართლა.

მიუხედავად იმისა, რომ ნიგერია ანგარიშში ჩამორჩა და გოლი აუცილებლად უნდა გაეტანა, თამაშს ვერ ამწვავებდა. საპასუხოდ, ხორვატია დიდად არ იკლავდა წინ თავქუდ მოგლეჯილი წასვლას და სცდილობდა, კლასის ხარჯზე გასულიყო ფონს. გავიდა კიდეც, რადგან მეორე გოლი გაიტანა. ამაში მარიო მანჯუკიჩის წვლილი ისევ დიდი იყო, რომელიც საჯარიმოში ძიუდოს ილეთით ეკონგმა დასცა და პენალტი ეჭვს არ იწვევდა. მატჩის საუკეთესო ფეხბურთელმა ლუკა მოდრიჩმა და ანგარიში გაზარდა და ყველა კითხვას პასუხი გასცა.

ხორვატიის ნაკრებმა ნიგერიას უფრო მაღალი კლასის ხარჯზე მოუგო და ჯგუფში გალიდერდა. დალიჩის საინტერესო ნაკრებს მეორე ტურში არგენტინის ნაკრებთან ელოდება საინტერესო 90 წუთი.

ხორვატია – ნიგერია 2:0 (1:0) VIDEO

კალინინგრადი, “კალინინგრად სთედიუმი”

მაყურებელი: 32 000

ხორვატია (4-2-3-1): შუბაშიჩი; ვრსალიკო, ლოვრენი, ვიდა, სტრინიჩი; რაკიტიჩი, მოდრიჩი; რებიჩი (კოვაჩიჩი 78), კრამარიჩი (ბროჟოვიჩი 60), პერიშიჩი; მანჯუკიჩი (პიაცა 86)

მწვრთნელი: ზლატკო დალიჩი

ნიგერია (4-2-3-1): უზოჰო; შეჰუ, ეკონგი, ბალოგუნი, იდოვუ; ნდიდი, ეტებო; მოზესი, ობი მიკელი (სიმი 88), აივობი (მუსა 62); იგალო (იენაჩო 72)

მწვრთნელი: გერნოტ რორი

გოლები: 1:0 ეტებო (32), 2:0 მოდრიჩი (71, პენ)

გაფრთხილება: რაკიტიჩი (30), ბროჟოვიჩი (89) – ეკონგი (70)

სტატისტიკა – კარისკენ დარტყმები: 11 (2) – 14 (2) ბურთის ფლობა: 53%-47% კუთხურები: 6:5 თამაშგარე: 2:1

მსაჯი: სანდრო რიჩი (ბრაზილია)

მატჩის საუკეთესო ფეხბურთელი: ლუკა მოდრიჩი (ხორვატია)