სეკივაკე ტოჩინოშინი მაისის ბაშოზე ისევ დაუმარცხებელია. დღეს გამართულ მეოთხე ტურში ლევან გორგაძემ კომუსუბი მიტაკეუმი საკმაოდ ადვილად გაიყვანა დოჰიოდან და ოთხქულიანი დადებითი ბალანსით (4:0) ლიდერთა ჯგუფშია, მეოთხე მაეგაშირა შოდაისთან, სეკივაკე იჩინოჯოსთან და იოკოძუნა ჰაკუჰოსთან ერთად.

ხვალ, მეხუთე ტურში ტოჩინოშინის მეტოქე პირველი მაეგაშირა კაისეი იქნება, რომელსაც მიმდინარე სუპერტურნირზე ჯერ ერთი ბრძოლაც არ მოუგია.

ლევან გორგაძეს მაისის ბაშოზე ოძეკის წოდების მოპოვების რეალური შანსი აქვს. ამისთვის ქართველ სეკიტორის თხუთმეტტურიან შეჯიბრებაში მინიმუმ ათი ქულის აღება დასჭირდება, რაც სტარტიდან და მისი საბრძოლო ფორმიდან გამომდინარე, სრულიად ლოგიკური იქნება.

რანგით მეორე ჯურიო ლიგაში კი გაგამარუს შიკონათი მოჭიდავე თეიმურაზ ჯუღელს ჯერჯერობით არაფერი გამოსდის. დღეს მან ზედიზედ მეოთხე ბრძოლა წააგო. საბოლოო დადებითი ბალანსის – კაჩიკოშისთვის გაგამარუს დარჩენილ 11 ტურში 8 ქულის აღება სჭირდება.