ლეგენდარული იტალიელი მწვრთნელი ფაბიო კაპელო იტალიურ ფეხბურთში ტურინის “იუვენტუსის” ჰეგემონიაზე საუბრობს და აღნიშნავს, რომ “იუვე” მომავალ სეზონშიც ჩემპიონი გახდება.

გარდა ამისა, კაპელომ 2006 წელს, “ოქროს ბურთის” შესახებაც გააკეთა კომენტარი, რომელიც ფაბიო კანავარომ მოიგო.

“ვეთანხმები იმ მოსაზრებას, რომ “იუვენტუსის” ერა არ დასრულებულა. “ბებერი ქალბატონი” სხვა იტალიურ გუნდებთან შედარებით ყველა ასპექტში მაღლა დგას. დარწმუნებული ვარ, რომ ტურინელები ზედიზედ მერვე სკუდეტოსაც მოიგებენ.

ბუფონი? – ცალსახად, ყველა დროის საუკეთესო მეკარეა. ბედნიერი ვარ, რომ 2006 წელს “ოქროს ბურთი” კანავარომ მოიგო, მაგრამ ამ პრიზს ჯიჯიც იმსახურებდა, ორივე თანაბრად. ჩემი აზრით, მაშინ გამარჯვებულის გამოსავლენად მონეტა უნდა აეგდოთ... მქონდა საშუალება, დინო ძოფის გვერდით მეთამაშა და ბუფონის მწვრთნელი ვყოფილიყავი. ამაზე მეტს ღმერთს ვერაფერს ვთხოვდი”, - განუცხადა კაპელომ Corriere Dello Sport-ს.

კაპელო ძოფთან ერთად "იუვენტუსსა" (1972-1976) და იტალიის ნაკრებში (1972-1978) თამაშობდა, ხოლო ბუფონს "იუვენტუსში" 2004-2006 წლებში ავარჯიშებდა. აქვე იმასაც შეგახსენებთ, რომ 2006 წელს "ოქროს ბურთი" ფაბიო კანავარომ მოიგო, ხოლო მეორე ადგილზე ჯანლუიჯი ბუფონი გავიდა.