ფეხბურთი

21:35 | 21.04.2018 | ნანახია [] - ჯერ

პრემიერლიგა: “ლივერპულმა” აუტსაიდერთან ვერ ივარგა

პრემიერლიგის 35-ე ტურის მატჩში “ლივერპული” გასვლაზე ბოლოადგილოსან “ვესტ ბრომვიჩს” დაუპირისპირდა და ორი ქულა დაკარგა.

მერსისაიდული კლუბისთვის შეხვედრის ბოლომდე ყველაფერი კარგად მიდიოდა. იურგენ კლოპის შეგირდებმა ტაიმი დენი ინგსის გოლით მოიგეს, რომელმაც მე-4 წუთზე ახლო მანძილიდან შეაგდო. 72-ე წუთზე კი ოქსლეიდ-ჩემბერლენის გადაცემა მოჰამედ სალაჰმა შეირგო, მეკარეს ბურთი კოხტად გადაუგდო თავზე და თითქოს შეხვედრის ბედი გადაწყვიტა, მაგრამ გათამაშების უიმედო აუტსაიდერმა ორი სტანდარტული გამოიყენა და “ლივერპულს” არ მოაგებინა: 79-ე წუთზე მოწოდებულ კუთხურს არეულობა და ჯეკ ლივერმორის გოლი მოჰყვა, ხოლო 88-ე წუთზე კარიუსის და მცველების შეუთანხმებელი თამაშით რონდონმა ისარგებლა და წონასწორობა აღადგინა – 2:2.

“ლივერპული” 71 ქულით მე-3 ადგილზეა და “ტოტენჰემს” სამი, ხოლო “ჩელსის” რვა ქულით უსწრებს, თუმცა ერთი შეხვედრით მეტი აქვს ჩატარებული. “ვესტ ბრომვიჩს” კი 25 ქულა აქვს და ჩემპიონშიფში გავარდნისგან ვეღარაფერი იხსნის.

დღის მეორე მატჩში გოლები არ გასულა: “უოტფორდი” და “კრისტალ პალასი” “ვიკარეიჯ როუდზე” უგოლოდ დაზავდნენ. “ლოსები” 38 ქულით მე-12 პოზიციას იკავებენ, ხოლო “არწივები” 35 ქულით მე-15 საფეხურზე არიან და მე-18 ადგილოსან “საუთჰემპტონს”, რომელსაც ერთი მატჩი თადარიგში აქვს – 6 ქულით უსწრებენ.

ვესტ ბრომვიჩი – ლივერპული 2:2 (0:1)

გოლები: 0:1 ინგსი (4), 0:2 სალაჰი (72), 1:2 ლივერმორი (79), 2:2 რონდონი (88)

უოტფორდი – კრისტალ პალასი 0:0

0.138883