იტალიური “მილანის” მეკარემ ჯანლუიჯი დონარუმამ სერია A-ში საიუბილეო, მეასე მატჩი ჩაატარა და რეკორდიც დაამყარა. საქმე ისაა, რომ დონარუმა იტალიის ჩემპიონატის ისტორიაში ყველაზე ახალგაზრდა კიპერია, რომელმაც 100-ჯერ მოასწრო მოედანზე გასვლა.

დონარუმამ აღნიშნულ შედეგს 19 წლისა და 49 დღის ასაკში უწია. აქამდე, რეკორდსმენი ჯანლუიჯი ბუფონი გახლდათ, რომელმაც სერია A-ში მეასე მატჩი 21 წლისა და 100 დღის ასაკში ჩაატარა. მესამე ადგილზეა სებასტიან ფრეი – (100 თამაში 22 წლისა და 223 დღის ასაკში).

შეგახსენებთ, ჯანლუიჯი დონარუმას დებიუტი 2015 წლის 25 ოქტომბერს, “სასუოლოსთან” მატჩში ჰქონდა და იქედან მოყოლებული “მილანის” ძირითად მეკარედ ჩამოყალიბდა.