საქართველოს ეროვნული ნაკრების მცველმა ჯიმი ტაბიძემ ესტონეთთან (2:0) გამარჯვების შემდეგ კომენტარი გააკეთა. “უფას” ცენტრალური მცველის თქმით, გახარებულია, როგორც გუნდის გამარჯვებით, ისე გატანილი გოლით.

“პირველ რიგში ძალიან გახარებული ვარ, რადგან გუნდმა მოიგო, კარგი თამაში აჩვენა. ორი ამხანაგური შეხვედრა ჩავატარეთ და ორივეში დამაჯერებლად გავიმარჯვეთ. რა თქმა უნდა, სადებიუტო გოლითაც გახარებული ვარ და განსაკუთრებული გრძნობაა ჩემთვის. ამხანაგურ თამაშებს რაც შეეხება, ძალიან მნიშვნელოვანია, რადგან ერთა ლიგას მომზადებული უნდა შევხვდეთ. კიდევ ორი სპარინგი გვაქვს დარჩენილი და ვფიქრობ, ეს სრულიად საკმარისი იქნება იმისთვის, რომ ერთა ლიგისთვის გუნდი 100%-ით მზად იყოს. პირველ რიგში ძალიან მნიშვნელოვანი გახლდათ, რომ გუნდმა კარგი ფეხბურთი აჩვენა და ეს შედეგშიც აისახა. ჩემი აზრით, გულშემატკივარი ბედნიერი უნდა იყოს, რადგან საქართველოს ნაკრებმა დამაჯერებლად გაიმარჯვა ორ შეხვედრაში”, - განაცხადა ტაბიძემ.

შეგახსენებთ, საქართველოს ნაკრებმა მარტის სპარინგები დამაჯერებლად მოიგო. ლიტვა 4:0, ხოლო ესტონეთი 2:0 დაამარცხა. ჯიმი ტაბიძემ კი, ესტონელთა კარში გოლიც გაიტანა და ეს მისი პირველი გოლი გამოდგა საქართველოს ნაკრების მაისურით.