საქართველოს ეროვნული ნაკრების და მოსკოვის "სპარტაკის" შემტევმა ნახევარმცველმა ჯანო ანანიძემ ლიტვასთან ამხანაგურ შეხვედრაში მძიმე ტრავმა მიიღო და ოპერაცია ჩაუტარდება. როგორც რუსული კლუბის ოფიციალური ვებგვერდი იუწყება, ფეხბურთელმა მარჯვენა მუხლის წინა ჯვარედინი იოგი დაიზიანა და ქირურგიული ჩარევაა საჭირო. აღნიშნული ინფორმაცია კლუბის მთავარ ექიმს მიხეილ ვართაპეტოვს "ჯვარონების" სამედიცინო შტაბმა მიაწოდა.
ასევე, რუსეთის ეროვნული ნაკრების და "სპარტაკის" ყოფილმა ექიმმმა იური ვასილკოვმა განაცხადა, რომ ასეთი ტრავმის სარეაბილიტაციო პერიოდი ნახევარ წელიწადამდე გრძელდება და რუსეთში ფეხბურთელების ხშირი ტრავმიანობა კლუბის ექიმებს დააბრალა.
ჯანო რომ ტრავმებითაა გაწამებული ეს ახალი ინფორმაცია არაა. მიმდინარე სეზონში სწორედ კოჭის დაზიანების გამო ბევრი შეხვედრა გამოტოვა და მხოლოდ რვა მატჩში მიიღო მონაწილეობა, მოედანზე კი საშუალოდ 39 წუთს ატარებდა.
