ტოჩინოშინმა ოსაკაში მიმდინარე ჰარუ ბაშოზე იოკოძუნა კაკურიუს პირველი მარცხი აგემა. სეკივაკეს წოდებით მოჭიდავე ლევან გორგაძემ მე-12 ტურის დამაგვირგვინებელ ბრძოლაში მრისხანე მეტოქე დოჰიოდან გადაიყვანა, მე-8 ქულა მოიპოვა და საბოლოო დადებითი ბალანსი – კაჩიკოში გაინაღდა.

სუპერტურნირის დასრულებამდე 3 ტურით ადრე, ქართველი სეკიტორის ანგარიშზე 8 მოგება და 4 წაგებაა. ტოჩინოშინი "იმპერატორის თასის” ზედიზედ მეორედ მოპოვების თეორიულ შანსს ჯერ კიდევ ინარჩუნებს. ხვალ მისი მეტოქე მეოთხე მაეგაშირა შოდაი იქნება, რომელსაც მიმდინარე ბაშოზე 6-6 მოგება და წაგება აქვს. ურთიერთშეხვედრებშიც უპირატესობა გორგაძის მხარესაა – 5:2.

რანგით მეორე, ჯურიო ლიგაში მოჭიდავე გაგამარუს შიკონათი ცნობილ თეიმურაზ ჯუღელსაც შეეძლო, დღეს გაენაღდებინა კაჩიკოში, მაგრამ წააგო და ბაშოს 7:5 ბალანსით აგრძელებს.