იტალიის ჩემპიონ ტურინის “იუვენტუსში’ ტრავმების ეპიდემია გრძელდება. “ბებერ ქალბატონს” ამჯერად ალექს სანდრო დაუშავდა. როგორც ბრაზილიიის ფეხბურთის ფედერაციის ვებგვერდი ოფიციალურად იტყობინება, მარცხენა მცველმა კუნთის დაზიანება მოსკოვში, რუსეთთან ამხანაგური მატჩის სამზადისის დროს, პირველივე ვარჯიშზე მიიღო.
ალექს სანდრომ უკვე დატოვა სანაკრებო შეკრება და ტურინში დაბრუნდა. სწორედ პიემონტის დედაქალაქში ჩაუტარდება მას სამედიცინო გამოკვლევა, რომელიც დაზიანების სიმძიმეს დაადგენს.
ალექს სანდრომდე იტალიის ნაკრების შეკრება ვადაზე ადრე დატოვა ჯორჯო კიელინიმ. იტალიელსაც კუნთის ტრავმა აღენიშნება. როგორც “იუვენტუსის” ვებგვერდი იტყობინება, ჯორჯოს ტრავმა სერიოზული არაა, თუმცა ფეხბურთელი ჯერაც დაკვირვების პროცესშია.
აქვე გეტყვით, რომ “იუვეს” ფედერიკო ბერნარდესკი და ხუან კუადრადოც ლაზარეთში ჰყავს. იტალიელი და კოლუმბიელი დიდი ალბათობით, მიმდინარე სეზონში მოედანზე გასვლას ვერ მოახერხებენ.
