“მანჩესტერ იუნაიტედის” ფრანგ ნახევარმცველ პოლ პოგბასა და გუნდის მთავარ მწვრთნელ ჟოზე მოურინიოს შორის დაძაბულ ურთიერთობაზე ბოლო პერიოდში ხშირად წერენ. ამ საკითხს ეხმაურება საფრანგეთის ნაკრების თავკაცი დიდიე დეშამიც, რომელიც ადასტურებს, რომ ფეხბურთელი ინგლისურ კლუბში მისი მდგომარეობით უკმაყოფილოა.

“პოლი “მანჩესტერ იუნაიტედში” ბედნიერი არაა. ის გუნდში მისი მდგომარეობით უკმაყოფილოა. ფეხბურთში ასეთი რამ ხდება და მსგავს სიტუაციაში შეიძლება ნებისმიერი ფეხბურთელი აღმოჩნდეს. ამ საკითხზე მასთან პირადად საუბარს ვგეგმავ, უკეთ რომ გავიგო კონკრეტულად რა აღელვებს. ჯერჯერობით სრულ ინფორმაციას არ ვფლობ და ამ ეტაპზე მეტს ვერაფერს ვიტყვი” - ციტირებს დეშამის სიტყვებს Daily Mail-ი.

პოგბმა ამჟამად ეროვნულ გუნდში დეშამის ხელმძღვანელობით კოლუმბიასთან (23 მარტი) და რუსეთთან (27 მარტი) გასამართი ამხანაგური მატჩებისთვის ემზადება.

ცოტა ხნის წინ, ფრანგი ფეხბურთელის აგენტი მინო რაიოლა აცხადებდა, რომ პოლი მანჩესტერის დატოვებას მანამდე არ აპირებს, სანამ გუნდთან ერთად პრემიერლიგას არ მოიგებს. თუმცა, ბრიტანული გამოცემების ინფორმაციით, ის მისი კლიენტისთვის ახალ კლუბს უკვე ეძებს.