ნაციონალურ საკალათბურთო ასოციაციაში მორიგი კარგი მატჩი ჩაატარა ზაზა ფაჩულიამ. თავიდან ის ვთქვათ, რომ საქართველოს ნაკრების ყოფილი კაპიტანი ხანგრძლივი პაუზის შემდეგ “გოლდენ სტეიტ უორიორზის” სასტარტო ხუთეულში დაბრუნდა.

ზაზამ ლოს-ანჟელეს “ლეიკესთან” 23 წუთი ითამაშა და ხსენებულ დროში ორმაგი დუბლი გაიფორმა – 10 ქულა, 12 მოხსნა, 5 პასი.

ფაჩულიამ 8-დან 4 ორქულიანი (50.0%) და 3-დან 2 საჯარიმო ჩააგდო (66.7%). აქვე გეტყვით, რომ ეს ზაზას ზედიზედ მეორე ორმაგი დუბლია. წინა შეხვედრაში ჩვენებურმა 16 ქულა და 11 მოხსნა გაახერხა.

რაც შეეხება უშუალოდ მატჩს – “გოლდენ სტეიტმა” მიჯრით ორი წაგების მერე, გამარჯვების გემო გაიხსენა და მეტოქეს 117:106 აჯობა. არ უთამაშიათ კლეი ტომპსონს, სტეფ კარისა და დრეიმონდ გრინს. ამის ფონზე, კევინ დურანტმა 35 წუთში 26 ქულა, 5 მოხსნა და 6 პასი მიითვალა. ზაზა კი ერთადერთი გამოდგა თანაგუნდელთა შორის, რომელმაც ორმაგი დუბლი შეასრულა.

“ლეიკერსის” რიგებში იგივე მხოლოდ ჯულიუს რენდლმა გააკეთა (22 ქულა, 10 მოხსნა), ბრუკ ლოპესმა და აიზია ტომასმა კი, 20-20 ქულით დაასრულეს შეხვედრა.

“გოლდენ სტეიტს” დასავლეთ კონფერენციაში 68 თამაშში 52 მოგების საპისრისპიროდ 16 წაგება აქვს და მეორე ადგილზე იმყოფება. “მეომრები” მომდევნო შეხვედრას 17 მარტს, შინ “საკრამენტო კინგსთან” ჩაატარებენ.