ფეხბურთი

20:30 | 21.02.2018 | ნანახია [] - ჯერ

იტალიის ნაკრები - კონტეც თანხმაა და რანიერიც

მსოფლიოს ოთხგზის ჩემპიონი იტალიის ეროვნული ნაკრები ჯერ კიდევ მთავარი მწვრთნელის გარეშე იმყოფება. მარტში გამოყოფილი სანაკრებო ფანჯრის დროს “სკუადრა აძურას” ლუიჯი დი ბიაჯო გაუძღვება, მაგრამ ის დროებით მწვრთნელია.

როგორც იტალიური ფეხბურთის მაღალჩინოსნები აცხადებენ, ახალი მწვრთნელის ვინაობა ზაფხულში გახდება ცნობილი. მანამდე კი, იტალიურ მედიაში სხვადასხვა კანდიდატებზე მიდის მსჯელობა.

მათ შორისაა კლაუდიო რანიერი, რომელიც როგორც გაირკვა, სიამოვნებით დათანხმდება “აძურას” გაწვრთნას.

“ნანტთან” კონტრაქტი კიდე ორი წელი მაკავშირებს და სხვა ვერაფერს ვიტყვი, მაგრამ თუ იტალიის ფეხბურთის ფედერაციიდან წინადადება მექნება, “ნანტის” ხელმძღვანელობას აუცილებლად ვთხოვ ხელშეკრულების გაწყვეტას”, - თქვა რანიერიმ.

“სკუადრა აძურას” გაძღოლაზე უარს არც ანტონიო კონტე ამბობს:

“კონტრაქტი 2019 წლის ზაფხულამდე მაქვს და შესაბამისად, აქ დარჩენას ვაპირებ. თუმცა, თუ ლონდონში სცენარი შეიცვლება მაშინ არ გამოვრიცხავ, რომ იტალიის ნაკრებში დავბრუნდე”, - განაცხადა კონტემ “ბარსელონასთან” მატჩის შემდეგ.

გარდა ზემოხსენებული ორი კანდიდატურისა, სახელდება რობერტო მანჩინისა და კარლო ანჩელოტის გვარებიც.

0.143338