ბრაზილიაში, ბაიას შტატის ჩემპიონატის მატჩი “ვიტორიასა” და “ბაიას” შორის მოედანზე ფეხბურთელთა არასაკმარისი რაოდენობით დარჩენის გამო შეწყდა. მსაჯს ამ თამაშში 10 წითელი და 8 ყვითელი ბარათის გამოყენება მოუწია.

მოედანზე მდგომარეობა უმართავი გახდა მეორე ტაიმის დასაწყისში, როცა “ბაიამ” ანგარიში გაათანაბრა (1:1). სტუმრების გოლის აღნიშვნის ფორმამ მასპინძლები გააღიზიანა და ხელჩართული ჩხუბი გაჩაღდა. თამაშის განახლება 16 წუთის შემდეგ მოხერხდა, როცა არბიტრმა “ვიტორიას” 3 ფეხბურთელი, ასევე “ბაიას” ძირითადი შემადგენლობის 2 და სათადარიგო 3 მოთამაშე გააძევა. მოედანზე 8 მასპინძელი და 9 სტუმარი ფეხბურთელი დარჩა, თუმცა 11 წუთში “ვიტორიას” კიდევ ორმა მოთამაშემ მიიღო წითელი ბარათი, რის გამოც მსაჯი იძულებული გახდა მატჩი შეეწყვიტა, რადგან ფიფას რეგლამენტის თანახმად, ერთი გუნდის შემადგენლობაში ყველაზე ცოტა 7 ფეხბურთელი მაინც უნდა თამაშობდეს.

რა გადაწყვეტილებას მიიღებს მომხდარზე სადისციპლინო კომიტეტი, უახლოეს დღეებში შევიტყობთ.