ფეხბურთი

3:36 | 15.02.2018 | ნანახია [] - ჯერ

ხუთოსანი "ლივერპული" (+VIDEO)

“ლივერპული” უეფას ჩემპიონთა ლიგის მეოთხედფინალშია. წინ მერვედფინალის საპასუხო მატჩია, მაგრამ ამაში ეჭვი არავის ეპარება. იურგენ კლოპის გუნდი “პორტუსთან” უდაო ფავორიტი იყო, მაგრამ იმას, რაც “დრაგაუზე” მოხდა, ბევრი ვერ წარმოიდგენდა.

0:5 – ერთი უნდა ითქვას, “ლივერპული” დიდებული გახლდათ და მეტოქე დედამიწის პირისაგან აღგავა. არადა, პირველი საგოლე მომენტი მასპინძლებს ჰქონდათ და ოტავიოს ოდნავ რომ გამართლებოდა, ანგარიშსაც გახსნიდა. მერე კი, უკვე ინგლისელებმა დაიწყეს და რა დაიწყეს! ჟოზე სას შეცდომით სანემ ისარგებლა და ანგარიში გახსნა. სენეგალელი ფანტასტიკური იყო და ჰეთ-თრიქიც შეასრულა. იგი “ლივერპულის” მეოთხე ფეხბურთელი გახდა მაიკლ ოუენის, იოსი ბენაიუნისა და ფილიპე კოუტინიოს შემდეგ, რომელმაც ლიგაზე ჰეთ-თრიქი გაიფორმა.

საერთოდ კი, “წითლების” შთამბეჭდავი თამაში შემტევმა ტრიომ განაპირობა. თუ სადიომ სამჯერ გაუტანა პასპინძლებს, უსაქმოდ არც სალაჰი და ფირმინო ყოფილან. გარდა იმისა, რომ გოლები მათაც შეაგდეს, უსაქმოდ არც სანეს გოლების კომბინაციების დროს ყოფილან. მოკლედ, “ლივერპულს” ძალიან საშიში და რაც მთავარია ამ დროისთვის ლიგაზე ყველაზე შედეგიანი თავდასხმა ჰყავს.

ასე იყო თუ ისე, “ლივერპულმა” მეოთხედფინალის საგზური ვადაზე ადრე გაიფორმა და შეუძლია წილისყრას მშვიდად დაელოდოს.

“პორტუ” – “ლივერპული” 0:5 (0:2) VIDEO

პორტუ, “დრაგაუ”

მაყურებელი: 47 718

“პორტუ” (4-2-3-1): ჟოზე სა; რიკარდუ, რეიესი, მარკანო, ალექს ტელეში; ოლივეირა, ერერა; მარეგა, ოტავიო (კორონა 46), ბრაჰიმი (მაჯედი 62); სოარეში (პასიენსია 74)

მწვრთნელი: სერჟიო კონსეისაო

“ლივერპული” (4-3-3): კარიუსი; ალექსანდერ-არნოლდი (გომესი 79); ლოვრენი, ვან დეიკი, რობერტსონი; მილნერი, ჰენდერსონი (მატიპი 75), ვეინალდუმი; სალაჰი, ფირმინო (ინგსი 80), მანე

მწვრთნელი: იურგენ კლოპი

გოლები: 0:1 მანე (25), 0:2 სალაჰი (29), 0:3 მანე (53), 0:4 ფირმინო (69), 0:5 მანე (85)

გაფრთხილება:

სტატისტიკა – კარისკენ დარტყმები: 5 (2) – 11 (6) ბურთის ფლობა: 47%-53% კუთხურები: 6:1 თამაშგარე: 3:1

მსაჯი: დანიელე ორსატო (იტალია)

0.483567