ჭადრაკის სასახლეში დასრულდა საქართველოს ჩემპიონატი 20 წლამდე ასაკის გოგონათა და ჭაბუკთა შორის. ასპარეზობა ამავე დროს საჭადრაკო მოღვაწის, კახი ჩიგოგიძის სახელს ატარებდა. ჩემპიონატის დახურვაზე ქართველი საჭადრაკო მოღვაწე თბილი სიტყვებით გაიხსენეს: ევროპის საჭადრაკო კავშირის პრეზიდენტმა ზურაბ აზმაიფარაშვილმა და საქართველოს ჭადრაკის ფედერაციის პრეზიდენტმა გია გიორგაძემ.

ჩემპიონატში დაწესებული იყო შემდეგი საპრიზო ფონდი:

I ადგილი - 500 ლარი;

II ადგილი - 300 ლარი;

III ადგილი - 200 ლარი;

I ადგილზე გასულმა მოჭადრაკეებმა 20 წლამდე ასაკის მოჭადრაკეთა მსოფლიოს ჩემპიონატზე მონაწილეობის უფლება მოიპოვეს.

შეჯიბრში სულ 23 გოგონა და 28 ჭაბუკი მონაწილეობდა.

გოგონათა ასპარეზობის უპირობო ლიდერად ევროპის ჩემპიონატების მრავალგზის ჩემპიონი და გამარჯვებული ნინო ხომერიკი მოიაზრებოდა, თუმცა მისმა მეორე ტურში ლილე ქორიძესთან განცდილმა მარცხმა ჩემპიონატს გარკვეული ინტერესი შემატა. წაგების შემდეგ ნინომ, ზედიზედ 6 პარტი ამოიგო და დასკვნითი ტურის წინ ჩემპიონობაც გაინაღდა. საბოლოოდ, მან 9-დან 7,5 დააგროვა და ერთი ქულით გაასწრო უახლოესს კონკურენტებს.

6,5 -6,5 ქულით II-III ადგილები გაინაწილეს და დამატებითი მაჩვენებლებით შემდეგნაირად განლაგდნენ:

2.მარიამ ჯანიაშვილი;

3.თამარ ესაძე.

ტექნიკური შედეგები

ვაჟთა პირველობის ფავორიტად ევროპის ჩემპიონატების მრავალგზის პრიზიორი თანატოლთა შორის გიორგი სიბაშვილი ითვლებოდა. ნინოს მსგავსად გიორგიმაც მოულოდნელი მარცხი იწვნია მეორე ტურში შოთა ხოდაშნელთან. თუმცა მომდევნო ტურებში 3 პარტიის ზედიზედ მოგება შესძლო, შემდეგ ფრე დააფიქსირა და კვლავ, ზედიზედ 3 პარტიის მოგებით ერთპიროვნულად დაისაკუთრა ჩემპიონობა. მეორე ადგილზე 7 ქულით ქვეყნის ასაკობრივი ჩემპიონატების მრავალგზის გამარჯვებული ლუკა ობოლაძე გავიდა, ხოლო ბრინჯაოს მედალი 6,5 ქულით ნოე თუთისანმა მოიპოვა.

ტექნიკური შედეგები

gcf.org.ge