ბრაზილიელმა ნახევარმცველმა ანდრეას პერეირამ განაცხადა, რომ ამ ეტაპზე “მანჩესტერ იუნაიტედში” დაბრუნება მის გეგმებში არ შედის და “მესტალიაზე” დარჩენა სურს.

გავრცელებული ინფორმაციის თანახმად, “იუნაიტედი” მიმდინარე სატრანსფერო ფანჯრის დროს 22 წლის ფეხბურთელის დაბრუნებაზე ფიქრობს, თუმცა ბრაზილიელ მოთამაშეს “ვალენსიადან” წასვლა არ უნდა.

“ახლა, როდესაც “მანჩესტერ იუნაიტედი” დუბაიში იმყოფება, მეეჭვება მოურინიო ჩემს თამაშს უყურებდეს. მე “ვალენსიაში” დარჩენა და ესპანეთის თასის მოგება მსურს. შესანიშნავი თამაში გამოგვივიდა. ვიეტოსთან თამაში ძალიან სასიამოვნო იყო, რადგან ერთმანეთის ჩინებულად გვესმოდა”, - განაცხადა ბრაზილიელმა “ლას პალმასთან” მოგებული (4:0) მატჩის შემდეგ.

შეგახსენებთ, რომ პერეირას სატრანსფერო უფლებებს “მანჩესტერ იუნაიტედი” ფლობს და ის “ვალენსიაში” იჯარით თამაშობს. მან “ღამურების” მაისურით 20-ჯერ ითამაშა, 1 გოლი გაიტანა და 5 საგოლე გადაცემა მიითვალა.