იტალიის სერია A-ს ლიდერი “ნაპოლი” ქვეყნის თასის გათამაშებას 1/4 ფინალური ეტაპიდან გამოეთიშა. “აძური” საკუთარ მოედანზე “ატალანტასთან” (1:2) დამარცხდა. მატჩის მერე ნეაპოლელთა თავკაცმა მაურიციო სარიმ მედიასთან ისაუბრა.

“ჩვენ “ატალანტასთან” პრობლემები ყოველთვის გვქონდა. ეს ძალიან ძლიერი გუნდია და მასთან თამაში მაშინაც გვიჭირდა, როდესაც სრულფასოვანი შემადგენლობით ვეთამაშებოდით.

თანაბარი თამაში იყო, თუმცა მეორე ტაიმში შეტევაში აგრესია დაგვაკლდა. ჩვენ მხოლოდ სერია A-ს მატჩებზე ვართ კონცენტრირებული და ეს ძალიან დიდი პრობლემაა”, - აღნიშნა სარიმ მატჩის შემდეგ.

მიმდინარე სეზონში “ნაპოლი” იტალიის თასის გათამაშების გარდა, ჩემპიონთა ლიგასაც გამოეთიშა და მხოლოდ ორ ტურნირს შემორჩა – ევროპა ლიგასა და სერია A-ს.