"მანჩესტერ იუნაიტედის" ნახევარმცველი მარუან ფელაინი ბელგიის ეროვნულ ნაკრებში კარიერას რუსეთში გასამართი 2018 წლის მსოფლიოს ჩემპიონატის შემდეგ დაასრულებს. აღნიშნული ინფორმაცია თავად ფეხბურთელმა ჟურნალ Humo-სთან საუბრისას გაავრცელა.

"2018 წლის მუნდიალი გახდება ბოლო ტურნირი, რომელშიც ბელგიის ნაკრებთან ერთად მივიღებ მონაწილეობას. ეროვნულ გუნდში უკვე 12 წელიწადი ვთამაშობ და ერთ-ერთი ყველაზე ასაკოვანი ვარ." - განაცხადა 30 წლის ფეხბურთელმა.

მარუანს "წითელი ეშმაკების" რიგებში დებიუტი 2007 წლის 7 თებერვალს, ჩეხეთის წინააღმდეგ გამართულ ამხანაგურ შეხვედრაში ჰქონდა. მას შემდეგ ფელაინიმ 80 მატჩი ჩაატარა და გულშემატკივრები 16 გოლით გაახარა.