დღეს, "ახალი თბილისის” სპორტულ კომპლექსში მდებარე ფრენბურთის არენაზე თავისუფალი სტილით ჭიდაობაში საქართველოს ჩემპიონატი დაიწყო. საქმეში ხუთი წონითი კატეგორიის მოჭიდავეები ჩაებნენ და ფინალისტები გამოავლინეს. გადამწყვეტი შეხვედრები კი ხვალ გაიმართება.

უმსუბუქეს წონაში - 57 კილოგრამში, ოქროს მედლისთვის ერთმანეთს ოთარ გოგავა და თეიმურაზ ვანიშვილი დაუპირისპირდებიან. 65 კილოგრამში შიდა კონკურენციაში ოლიმპიური, მსოფლიოსა და ევროპის ჩემპიონი ვლადიმერ ხინჩეგაშვილიც ჩაერთო. დღე წაუგებლად ჩაამთავრა და ფინალში გავიდა, სადაც მისი მეტოქე 23-წლამდელთა შორის ევროპის პრიზიორი შოთა ფარტენაძე იქნება.

თანამედროვე ქართული ჭიდაობის ყველაზე ტიტულოვანმა სპორტსმენმა აქამდე ყველა დიდი გამარჯვება 57 და 61 კილოგრამ წონით კატეგორიებში მოიპოვა. ახლა კი უკვე კიდევ ერთი წონით მაღლა ცდილობს ნაკრებში დამკვიდრებას და მისი გადაწყვეტილება ლოგიკურიცაა – 61 კილოგრამი არაოლიმპიური წონაა და ტოკიო 2020-ზე მოსახვედრად ხინჩეგაშვილმა ან ისევ 57-მდე უნდა დაიკლოს, ან 65-მდე მოიმატოს.

74 კილოგრამ წონით კატეგორიაში ფინალის საგზურები ავთანდილ კენჭაძემ და ზურაბ ერბოწონაშვილმა მოიპოვეს. 86 კილოგრამში ყველას დავით ხუციშვილმა და სანდრო ამინაშვილმა აჯობეს, ხოლო 97 კილოგრამში – ელიზბარ ოდიკაძემ და ზვიად მეტრეველმა. ამ უკანასკნელმა ნახევარფინალში ახალგაზრდებსა და 23-წლამდელთა შორის ევროპის მოქმედ ჩემპიონს – გივი მაჭარაშვილს სძლია (5:2).

ფინალები ხვალ, 17:00 საათზე დაიწყება. იქამდე კი ხალიჩა დარჩენილი ხუთი წონის მოჭიდავეებს დაეთმობათ, წინასწარი ეტაპების შეხვედრების ჩასატარებლად. საქართველოს ნაკრების სამწვრთნელო შტაბისა და ჭიდაობის ფედერაციის ხელმძღვანელობის გადაწყვეტილებით, შიდა კონკურენციაში მონაწილეობა ნაკრების ყველა ტიტულოვანი წევრისთვის სავალდებულოა.