მადრიდის „რეალი“ ტურინის „იუვენტუს“ თავდამსხმელ პაულო დიბალას აგენტთან მოლაპარაკებებს აწარმოებს. Rai Sport-ის ინფორმაციით, არგენიტნელი შემტევის ძმა გუსტავო დიბალა, თავისი ძმისა და ამავდროულად კლიენტის „რეალში“ შესაძლო გადასვლაზე მუშაობს.

აღსანიშნავია, რომ მადრიდული გრანდის პრეზიდენტ ფლორენტინო პერესს 23 წლის ფეხბურთელის გადაბირება კარგა ხანია სურს. გავრცელებული ცნობით, დიბალა ხელფასის სახით სეზონში 10 მილიონ ევროს ითხოვს, თუმცა ამ წინადადებაზე პერესი ჯერ კიდევ ფიქრობს. ამჟამად „იუვეში“ სამხრეთამერიკელი გასამარჯელოს სახით 7 მილიონს იღებს.

საგულისხმოა ის გარემოებაც, რომ დიბალა ბოლო დროს „იუვენტუსის“ სასტარტო შემადგენლობაში ვერ ხვდება. უკანასკნელი ორი მატჩი მან სათადარიგო სკამიდან დაიწყო.

დიბალამ მიმდინარე სეზონში იტალიის სერია A-ში 17 შეხვედრაში 12 გოლი გაიტანა და 3 საგოლე გადაცემა მიითვალა.