ქართველმა ძიუდოისტებმა ბექა ღვინიაშვილმა (90 კგ), ვარლამ ლიპარტელიანმა (100 კგ) და გურამ თუშიშვილმა (+100 კგ) 2017 წლის მასტერსი ოქროს მედლებით ჩაამთავრეს. სანქტ პეტერბურგში გამართული უპრესტიჟულესი საერთაშორისო ტურნირის ფინალში ღვინიაშვილმა სამხრეთკორეელი მსოფლიოს ჩემპიონი (2015) დონგჰან გვაკი გააკრა ტატამს. ლიპარტელიანმა მსოფლიოს რეიტინგის ლიდერს – ჰოლანდიელ მაიკლ კორელს სძლია ვაზარით. თუშიშვილმა კი მსოფლიოს ყველაზე მაღალრეიტინგიანი მძიმეწონოსანი – დავიდ მოურა დასცა ბეჭებზე.

მასტერსის ქართველმა ჩემპიონებმა ოქროს მედლებთან ერთად 1800-1800 ქულაც გამოიმუშავეს. სულ კი საქართველოს ნაკრებმა სანქტ პეტერბურგში ხუთი მედალი მოიპოვა. გუშინ ლაშა შავდათუაშვილი (73 კგ) პოდიუმის მეორე საფეხურზე ავიდა, ხოლო ვაჟა მარგველაშვილი (66 კგ) – მესამეზე.

ქართული გუნდი სეზონის დამაგვირგვინებელ შეჯიბრებაზე სულ ექვსკაციანი შემადგენლობით გამოვიდა და უმედლოდ მხოლოდ ზებედა რეხვიაშვილი (81 კგ) დარჩა.